ෆේස්බුක් සඳහා නව විශේෂාංග කිහිපයක් මෙටා සමාගමෙන්

පරිශීලකයින්ට තොරතුරු සෙවීම, අන්තර්ගතයන් නිර්මාණය කිරීම සහ වේදිකාව හරහා වඩාත් පහසුවෙන් සම්බන්ධ වීම සඳහා උපකාරී වන කෘතිම බුද්ධිය (AI) මගින් ක්‍රියාත්මක වන නව විශේෂාංග රැසක් මෙටා සමාගම විසින් ෆේස්බුක් වෙත හඳුන්වා දී තිබෙනවා.

මෙම නව එකතු කිරීම් අතර 'AI Mode' ප්‍රමුඛ වන අතර, මෙය මෙටා AI (Meta AI) මගින් ක්‍රියාත්මක වන සෙවුම් (Search) පහසුකමක්.

එමගින් ෆේස්බුක් ගෲප් සහ රීල්ස් ඇතුළු මෙටා සමාගමට අයත් වේදිකාවල ප්‍රසිද්ධියේ බෙදාගෙන ඇති (Publicly shared) අන්තර්ගතයන් මත පදනම්ව ක්‍රියාත්මක වෙනවා.

සාම්ප්‍රදායික සෙවුම් ප්‍රතිඵල පමණක් පෙන්වනවා වෙනුවට, සැබෑ පරිශීලකයින්ගේ අදහස්, මතයන් සහ නිර්දේශ ලබා දීමට මෙම 'AI Mode' විශේෂාංගය සැලසුම් කර ඇති බව සඳහන්.

මෙටා සමාගම ප්‍රකාශ කර ඇත්තේ, තම ඇප්ස් (Apps) හරහා ප්‍රසිද්ධියේ හුවමාරු වන සංවාද සහ අත්දැකීම් පිළිබිඹු වන පරිදි ප්‍රතිචාර දැක්වීම සඳහා මෙම විශේෂාංගය මගින් AI තාක්ෂණය භාවිත කරන බවයි.

එමෙන්ම, අන්තර්ගතයන් නිර්මාණය කිරීම වඩාත් සරල කිරීම සඳහා කෘතිම බුද්ධියෙන් ක්‍රියාත්මක වන නව නිර්මාණශීලී මෙවලම් ද (Creative tools) සමාගම විසින් හඳුන්වා දී තිබෙනවා.

මීට කොලාජ් ටෙම්ප්ලේට් (Collage templates), ස්වයංක්‍රීය වීඩියෝ මොන්ටාජ් (Automated video montages) සහ ට්‍රාන්සිශන් ඉෆෙක්ට්ස් (Transition effects) ඇතුළත්, යාවත්කාලීන කරන ලද 'කැමරා රෝල් ශෙයාරිං' (Camera roll sharing) ඇතුළත්.

මේවා මගින් පරිශීලකයින්ට තම ඡායාරූප සහ වීඩියෝ පහසුවෙන් බෙදාගත හැකි අන්තර්ගතයන් බවට පත් කරගත හැකියි.

මෙටා සමාගමට අනුව, මෙම 'කැමරා රෝල් ශෙයාරිං' යෝජනා ක්‍රමය අනිවාර්ය නොවන (Optional) අතර ඕනෑම වේලාවක එය අක්‍රිය (Disable) කිරීමේ හැකියාව ද පවතිනවා.

මීට අමතරව, ෆේස්බුක් පරිශීලකයින්ට ඡායාරූපවල ඇති ඇඳුම් පැළඳුම්, කොණ්ඩා මෝස්තර සහ උපාංග (Accessories) ඩිජිටල් තාක්ෂණය ඔස්සේ වෙනස් කිරීමට ඉඩ සලසන නව 'AI එඩිටිං' (AI editing) විශේෂාංග ද හිමි වනු ඇති.

ක්‍රීඩා ලෝලීන්ට ද ස්ටෝරීස් (Stories) සහ ප්‍රොෆයිල් පික්චර්ස් (Profile pictures) සඳහා ලබා දී ඇති AI මෙවලම් භාවිතයෙන්, තමන් කැමති ක්‍රීඩා කණ්ඩායම්වල නිල ඇඳුම් (Jerseys) සහ වෙනත් තේමාත්මක ඇඳුම් ඩිජිටල් ලෙස හැඳින්වීමේ හැකියාව ලැබෙන බව සඳහන්.

ෆේස්බුක් අත්දැකීම තුළ කෘතිම බුද්ධිය උපරිමයෙන් භාවිත කරමින්, පරිශීලකයින්ට තොරතුරු සොයා ගැනීමට, නිර්මාණශීලිත්වය ප්‍රකාශ කිරීමට සහ අන්තර්ගතයන් බෙදා ගැනීමට පහසු කිරීම මෙම යාවත්කාලීන කිරීම්වල අරමුණ බව මෙටා සමාගම වැඩිදුරටත් සඳහන් කර තිබෙනවා.

මෙම නව විශේෂාංග මේ වන විට ෆේස්බුක් පරිශීලකයින් වෙත ක්‍රමයෙන් නිකුත් කරමින් පවතිනවා.

_විදෙස් මාධ්‍ය_