Vito Wood Fired Pizza සිය 6 වැනි ශාඛාව City of Dreamsහි විවෘත කරයි

ශ්‍රී ලංකාවේ වේගයෙන් වර්ධනය වන ආපනශාලා ක්ෂේත්‍රයේ සිය සන්නාම ව්‍යාප්තිය තවදුරටත් ශක්තිමත් කරමින් Vito Wood Fired Pizza සිය 6 වැනි ශාඛාව City of Dreams Sri Lanka හි The Shoppes පරිශ්‍රයේ විවෘත කර තිබේ.

මෙම නව ශාඛාව විවෘත කිරීමත් සමඟ ලොව පිළිගත් ඉතාලි දැව උඳුනේ පිසූ පීසා රසය, ශ්‍රී ලංකාවේ ප්‍රමුඛතම සුඛෝපභෝගී සාප්පු සවාරි, විනෝදාස්වාද හා ආහාර පාන ගමනාන්තයකට රැගෙන ඒමට Vito Wood Fired Pizza සමත්ව ඇත.

2017 වසරේ මහනුවර නගරයේ සේවකයන් පස්දෙනෙකුගෙන් ආරම්භ වූ Vito Wood Fired Pizza, අද වන විට ශ්‍රී ලංකාවේ ප්‍රමුඛ පෙළේ දැව උඳුනේ පිසූ ඉතාලි පීසා අවන්හල් සන්නාමයක් බවට පත්ව තිබේ. සාම්ප්‍රදායික දැව උඳුන්වල පිසූ තුනී ඉතාලි පීසා දේශීය රසයන් සමඟ නවීන ලෙස ඉදිරිපත් කිරීම හේතුවෙන් මෙම සන්නාමය පාරිභෝගිකයන් අතර විශාල ජනප්‍රියත්වයක් දිනාගෙන ඇත.

නව අවන්හල තුළ අතින් සකස් කළ පීසා පිටි, උසස් තත්ත්වයේ ආනයනික චීස්, දේශීයව සපයා ගන්නා නැවුම් අමුද්‍රව්‍ය සහ සාම්ප්‍රදායික ඉතාලි ආහාර පිසීමේ ක්‍රමවේද යොදා ගනිමින් සකස් කළ ආහාර පිරිනැමේ. පීසා වර්ග රැසකට අමතරව ලසඤ්ඤා, කැල්සෝන්, ආර්ටිසන් පැස්ටා, නැවුම් සලාද, අතුරුපස, මිල්ක්ෂේක්, මොක්ටේල් සහ විවිධ පාන වර්ගද මෙනුවට ඇතුළත්ය.

නව ශාඛාව විවෘත කිරීමේ අවස්ථාවට පාරිභෝගිකයන්, ව්‍යාපාර හවුල්කරුවන්, ආරාධිත අමුත්තන් සහ සුබපතන්නන් රැසක් එක්ව සිටියහ.

මෙම නව අවන්හල විවෘත කිරීමත් සමඟ City of Dreams Sri Lanka හි ආහාර පාන අත්දැකීම තවදුරටත් ශක්තිමත් වන අතර, සුඛෝපභෝගී හෝටල්, ජාත්‍යන්තර මට්ටමේ සිල්ලර වෙළෙඳසැල්, විනෝදාස්වාද පහසුකම් සහ ලෝක මට්ටමේ ආහාර පාන සේවාවන්ගෙන් සමන්විත මෙම ඒකාබද්ධ සංචාරක ගමනාන්තයට තවත් වටිනාකමක් එක් කරයි.

මෙහිදී Vito Wood Fired Pizza කළමනාකාරිත්වය පසුගිය වසර අට තුළ සන්නාමයේ සාර්ථකත්වයට දායක වූ සිය විශ්වාසවන්ත පාරිභෝගිකයන්, කැපවූ සේවකයන් සහ ව්‍යාපාර හවුල්කරුවන් වෙත සිය කෘතඥතාව පළ කළේය.

මහනුවර, කොළඹ, පේරාදෙණිය, මීගමුව, ගාල්ල සහ දැන් City of Dreams Sri Lanka ඇතුළුව ශාඛා හයකින් සමන්විත Vito Wood Fired Pizza, ඉදිරියේදීත් ශ්‍රී ලංකාව පුරා සිය ව්‍යාප්තිය තවදුරටත් පුළුල් කරමින් සත්‍ය ඉතාලි රසය, උසස් තත්ත්වයේ ආහාර සහ විශිෂ්ට පාරිභෝගික සේවාව සමඟ අමතක නොවන ආහාර පාන අත්දැකීම් පිරිනැමීම සිය ඉලක්කය බව සඳහන් කළේය.