අමෙරිකානු සරසවි ශූරතා මූලික තරගයකදී ජාකෝබ් තාර්ප් 110m කඩුළු මතින් දිවීමේ ලෝක වාර්තාව බිඳ දමයි

අමෙරිකානු සරසවි ශූරතා මූලික වටයේ තරඟ අතරතුරදී ජැකෝබි තාර්ප් (Ja'Kobe Tharp) මීටර් 110 කඩුලු පැනීමේ ලෝක වාර්තාව බිඳ දැමීමට සමත් වුණා.

ඕබර්න්, ඇලබාමාහි පදිංචි මෙම 20 හැවිරිදි ක්‍රීඩකයා ඔරිගන්හි යුජින්හි පැවැති ජාතික විද්‍යාලයීය මලල ක්‍රීඩා සංගම් (NCAA) තරඟාවලියේදී තත්පර 12.75 ක කාලයක් වාර්තා කළා.

මීට පෙර පැවති තත්පර 12.80 ක ලෝක වාර්තාව 2012 සැප්තැම්බර් මාසයේදී බ්‍රසල්ස් හිදී ඔහුගේම රටේ ක්‍රීඩකයෙකු වන ඒරීස් මෙරිට් (Aries Merritt) විසින් තබා තිබුණා.

වත්මන් ඔලිම්පික් ශූර ග්‍රාන්ට් හොලෝවේ (Grant Holloway) විසින් 2019 වසරේදී තත්පර 12.98 කින් මීට පෙර පැවති විද්‍යාලයීය (collegiate) වාර්තාව පිහිටුවා තිබුණා.

වසර 50කට පසු NCAA ශූරතාවලියකදී ලෝක වාර්තාවක් පිහිටුවූ පළමු ක්‍රීඩකයා වන්නේ තාර්ප් ය.

ඔහුගේ මීට පෙර හොඳම කාලය තත්පර 13.01 ක් වූ අතර, ඔහු මෙම තරඟාවලියට පැමිණියේ එය බිඳ දැමීමේ බලාපොරොත්තුවෙන් වුවද, තත්පර හතරෙන් පංගුවකට වඩා වැඩි කාලයක් අඩු කරමින් ලෝක වාර්තාවක් පිහිටුවීමට හැකිවනු ඇතැයි ඔහු අපේක්ෂා කළේ නොමැති බවයි විදෙස් මාධ්‍ය පවසන්නේ.

"මම පුදුම හිතෙන දෙයක් කරන්න සූදානමින් සිටි බව මම දැන සිටියා," ඔහු මාධ්‍යවේදීන්ට පවසා සිටියා.

"මට කළ හැකි දේ ගැන මට වැටහීමක් තිබුණා, නමුත් මේ වගේ දෙයක් මම බලාපොරොත්තු වුණේ නැහැ. මේ තරගාවලිය සඳහා මගේ සැලසුම් ඇතුළේ (bingo chart) ඒ වගේ දෙයක් තිබුණේම නැහැ. ඇත්තටම මට කියන්න වචන නැහැ." යනුවෙන් ඔහු පවසා සිටියා.

තාර්ප් සිකුරාදා පැවැත්වෙන අවසන් මහා තරඟයට තරඟ වැදීමට නියමිත අතර, එහිදී ඔහුගේ අරමුණ වන්නේ 2019 වසරේ හොලෝවේගෙන් පසුව පිට පිටම දෙවන වරටත් NCAA ශූරතාව දිනාගත් පළමු කඩුලු පැනීමේ ක්‍රීඩකයා බවට පත්වීමයි.