3 ஆம் நாள் ஆட்ட நேர முடிவில் மே.இ.தீவுகள் 318 ஓட்டங்களை பெற்றது!

இலங்கைக்கு அணிக்கு எதிரான இரண்டாவது டெஸ்ட் போட்டியின் மூன்றாம் நாள் ஆட்டநேர முடிவில், தமது முதலாவது இன்னிங்ஸுக்காக துடுப்பாடி வரும் மேற்கிந்திய தீவுகள் அணி 4 விக்கெட்டுகளை இழந்து 318 ஓட்டங்களைப் பெற்றிருந்தது.

நோர்த் சவுண்டில் நடைபெற்று வரும் இந்த போட்டியில் நாணய சுழற்சியில் வெற்றி பெற்று முதலில் துடுப்பெடுத்தாடிய இலங்கை அணி, தனது முதல் இன்னிங்ஸிற்காக 9 விக்கெட்டுகளை இழந்து 549 ஓட்டங்களைப் பெற்றிருந்த வேளையில் ஆட்டத்தை இடைநிறுத்திக் கொண்டது.

மேற்கிந்திய தீவுகள் தமது முதலாவது இன்னிங்ஸுக்காக தற்போது துடுப்பாடுகிறது.

ஆரம்ப வீரர்களாகக் களம் இறங்கிய பிரண்டன் கிங் 17 ஓட்டங்களுடனும், ஜோன் கெம்ப்பெல் 72 ஓட்டங்களுடனும் ஆட்டமிழந்தனர்.

பின்னர் வந்த கவேம் ஹாட்ஜ் 31 ஓட்டங்களையும், அமீர் ஜங்கு 9 ஓட்டங்களையும் பெற்று ஆட்டமிழக்க, மேற்கிந்திய தீவுகள் அணி 144 ஓட்டங்களுக்கு 4 விக்கெட்டுகளை இழந்து இக்கட்டான நிலையில் இருந்தது.

ஐந்தாவது விக்கெட்டுக்காக ஜோடி சேர்ந்த ஷாய் ஹோப் மற்றும் ஜஸ்டின் கிரீவ்ஸ் ஆகியோரின் நிதானமான ஆட்டத்தினால் மேற்கிந்திய தீவுகள் அணி சரிவிலிருந்து மீண்டது.

இன்றைய ஆட்ட நேர முடிவில் ஷாய் ஹோப் 86 ஓட்டங்களுடனும், ஜஸ்டின் கிரீவ்ஸ் 85 ஓட்டங்களுடனும் ஆட்டமிழக்காமல் களத்தில் இருந்தனர்.

பந்துவீச்சில் இலங்கை அணி சார்பில் அசித்த பெர்னாண்டோ மற்றும் பிரபாத் ஜயசூரிய ஆகியோர் தலா 2 விக்கெட்டுகளைக் கைப்பற்றியுள்ளனர்.

தற்போது மேற்கிந்திய தீவுகள் அணி, இலங்கையின் முதல் இன்னிங்ஸ் ஓட்ட எண்ணிக்கையை விட 231 ஓட்டங்கள் பின்தங்கியுள்ளது.