ஐ.பி.எல். ஏலம் 2026: ஒரு முழுமையான அலசல்

எதிர்பார்ப்புகளுக்கு மத்தியில் அபுதாபியில் நடைபெற்ற 2026 ஆம் ஆண்டுக்கான இந்தியன் பிரீமியர் லீக் (IPL) மினி ஏலம் இன்று (டிசம்பர் 16) இனிதே நிறைவுற்றது.

விறுவிறுப்பாக நடைபெற்ற இந்த ஏலத்தின் முடிவில், 10 அணிகளும் தலா 25 வீரர்களைக் கொண்ட முழுமையான பலத்துடன் எதிர்வரும் தொடருக்குத் தயாராகியுள்ளன.

சாதனை படைத்த கெமரூன் கிரீன்

இந்த ஏலத்தில் அவுஸ்திரேலிய அணியின் அதிரடி சகலதுறை வீரர் கெமரூன் கிரீன் அதிக விலைக்கு ஏலம் போன வீரர் என்ற சாதனையைப் படைத்தார்.

கடும் போட்டிக்கு மத்தியில் கொல்கத்தா நைட் ரைடர்ஸ் (KKR) அணி அவரை 25.20 கோடி இந்திய ரூபாய்க்குத் தன்வசப்படுத்தியது.

அத்துடன், இலங்கை வேகப்பந்து வீச்சாளர் மதீஷ பத்திரனவை 18 கோடி இந்திய ரூபாய்க்கும், பங்களாதேஷ் வீரர் முஸ்தஃபிசுர் ரஹ்மானை 9.20 கோடி ரூபாய்க்கும் கேகேஆர் நிர்வாகம் ஏலத்தில் எடுத்தது.

அதிரடி காட்டிய அணிகள்

சென்னை சுப்பர் கிங்ஸ் (CSK) அணி யாரும் எதிர்பாராத விதமாக இளம் இந்திய வீரர்களான பிரசாந்த் வீர் மற்றும் கார்த்திக் ஷர்மா ஆகியோரை தலா 14.20 கோடி ரூபாய்க்கு ஏலத்தில் எடுத்து அனைவரது கவனத்தையும் ஈர்த்தது.

சன்ரைசர்ஸ் ஹைதராபாத் அணி இங்கிலாந்தின் லியாம் லிவிங்ஸ்டோனை 13 கோடி ரூபாய்க்கும், லக்னோ சூப்பர் ஜெயண்ட்ஸ் அணி ஜோஷ் இங்லிஸை 8.60 கோடி ரூபாய்க்கும் வாங்கியுள்ளன.

மேலும், டெல்லி கெப்பிடல்ஸ் அணி ஆஹிப் நபி தாரை 8.40 கோடி ரூபாய்க்கும், ராஜஸ்தான் ராயல்ஸ் ரவி பிஷ்னோயை 7.2 கோடி ரூபாய்க்கும் ஒப்பந்தம் செய்தன.

அணிகளின் தற்போதைய பலம்

இந்த ஏலத்தில் மொத்தமாக 215.45 கோடி ரூபாய் செலவிடப்பட்டுள்ளதுடன், 29 வெளிநாட்டு வீரர்கள் உட்பட மொத்தம் 77 வீரர்கள் ஏலம் எடுக்கப்பட்டுள்ளனர்.

ஏலத்தின் முடிவில் சென்னை, டெல்லி, கொல்கத்தா, மும்பை, பஞ்சாப், ராஜஸ்தான், பெங்களூரு மற்றும் ஹைதராபாத் ஆகிய 8 அணிகளும் தலா 8 வெளிநாட்டு வீரர்களுடன் முழுப்பலத்தைப் பெற்றுள்ளன.

குஜராத் மற்றும் லக்னோ ஆகிய அணிகள் தலா 7 வெளிநாட்டு வீரர்களைத் தமது குழாமில் கொண்டுள்ளன.

திறமையான இளம் வீரர்களும் அனுபவம் வாய்ந்த சர்வதேச நட்சத்திரங்களும் ஏலத்தில் இணைக்கப்பட்டுள்ளதால், ஐ.பி.எல். 2026 தொடர் முன்னெப்போதையும் விட அதிக விறுவிறுப்பாக இருக்கும் என எதிர்பார்க்கப்படுகிறது.