தனிப்பெரும் கட்சியான தவெகவுக்கு ஆதரவு அளிக்குமா அதிமுக? - ஓ.எஸ்.மணியன் விளக்கம்

தமிழக சட்டமன்ற தேர்தலில் தமிழக வெற்றிக் கழகம் 108 இடங்களில் வெற்றி பெற்று தனிப்பெரும் கட்சியாக உருவெடுத்துள்ளது.

எனினும், ஆட்சி அமைக்கத் தேவையான பெரும்பான்மை பலத்தை அக்கட்சி பெறவில்லை.

இந்த தேர்தலில் திராவிட முன்னேற்றக் கழகம் 59 இடங்களிலும், அண்ணா திராவிட முன்னேற்றக் கழகம் 47 இடங்களிலும், இந்திய தேசிய காங்கிரஸ் 5 இடங்களிலும், பாட்டாளி மக்கள் கழகம் 4 இடங்களிலும், இந்திய யூனியன் முஸ்லிம் லீக், இந்திய கம்யூனிஸ்ட், விடுதலை சிறுத்தைகள் கட்சி, மார்க்சிஸ்ட் ஆகிய கட்சிகள் தலா 2 இடங்களிலும், பாரதீய ஜனதா கட்சி, தேசிய முற்போக்கு திராவிட கழகம், அம்மா மக்கள் முன்னேற்றக் கழகம் ஆகிய கட்சிகள் தலா 1 இடத்திலும் வெற்றி பெற்றுள்ளன.

இந்த சூழலில், தமிழக வெற்றிக் கழகம் ஆட்சி அமைக்க எந்தெந்த கட்சிகள் ஆதரவு அளிக்கும் என்ற எதிர்பார்ப்பு நிலவி வருகிறது.

இந்தநிலையில், வேதாரண்யம் தொகுதியில் அண்ணா திராவிட முன்னேற்றக் கழகம் சார்பில் போட்டியிட்டு வெற்றி பெற்றுள்ள ஓ.எஸ்.மணியன், சென்னையில் அந்த கட்சியின் பொதுச்செயலாளர் எடப்பாடி பழனிசாமியைச் சந்தித்தார்.

பின்னர் செய்தியாளர்களைச் சந்தித்த அவர், இது சந்திப்பு அல்ல என்றும், கட்சியின் பொதுச்செயலாளருக்கு நன்றி தெரிவித்துவிட்டு வந்துள்ளதாகவும், தமிழகத்தில் அதிமுகவே பெரிய கட்சி என்றும் தெரிவித்தார்.

மேலும், ‘ஆட்சி அமைக்க தவெகவுக்கு அதிமுக ஆதரவு அளிக்குமா?’ என்ற கேள்விக்கு ‘இல்லை’ (No) என்று அவர் திட்டவட்டமாகக் கூறினார்.

எனினும், லால்குடி தொகுதியில் அதிமுக சார்பில் வெற்றி பெற்றுள்ள லீமா ரோஸ் மார்ட்டின், ‘அதிமுகவுடன் தவெக பேச்சுவார்த்தை நடத்தி வருகிறது’ என்று தெரிவித்துள்ளார். இதன் மூலம், தவெகவுக்கு ஆதரவு அளிப்பது தொடர்பாக அதிமுக சட்டமன்ற உறுப்பினர்களிடையே முரண்பட்ட கருத்துகள் நிலவுவது குறிப்பிடத்தக்கது.