இயக்குநர் இமயம் பாரதிராஜாவின் மறைவு: தனது முக்கிய அறிவிப்பை ஒத்திவைத்தார் ராகவா லோரன்ஸ்

இது தொடர்பாக அவர் தனது உத்தியோகபூர்வ சமூக வலைத்தளப் பக்கத்தில் வெளியிட்டுள்ள பதிவில்,

தனது வாழ்க்கையின் முக்கிய முடிவொன்றை வியாழக்கிழமை காலை 9:30 மணிக்கு அறிவிப்பதாக முன்னதாகத் தெரிவித்திருந்ததை நினைவூட்டியுள்ளார்.

எனினும், தற்போதைய பாரதிராஜாவின் மறைவுச் செய்தி ஒட்டுமொத்தத் திரைத்துறையையும் சோகத்தில் ஆழ்த்தியுள்ளதாகவும், இந்த இழப்பு தனது குடும்ப உறுப்பினர் ஒருவரை இழந்தது போன்ற தனிப்பட்டதொரு சோகமாகத் தனக்கு உணர்வதாகவும் அவர் குறிப்பிட்டுள்ளார்.

இதனால், பாரதிராஜாவின் மீதான மதிப்பு மற்றும் சினிமாத்துறைக்கு அவர் ஆற்றிய அளப்பரிய பங்களிப்புகளுக்கு மரியாதை செலுத்தும் முகமாக, தனது அறிவிப்பை ஒத்திவைக்க முடிவெடுத்துள்ளதாக ராகவா லாரன்ஸ் தெரிவித்துள்ளார்.

இதற்கமைய, இந்த முக்கிய அறிவிப்பானது எதிர்வரும் வெள்ளிக்கிழமை காலை 10:00 மணிக்கு வெளியிடப்படும் என அவர் தனது பதிவில் மேலும் குறிப்பிட்டுள்ளார்.