போஸ்னியா-ஹெர்சகோவினா வெற்றி - தொடரிலிருந்து கட்டார் வெளியேற்றம்

கால்பந்து உலகக் கிண்ணத் தொடரின் 'B' குழுவுக்கான லீக் போட்டியில் கட்டார் அணியை 3 - 1 என்ற கோல் கணக்கில் போஸ்னியா-ஹெர்சகோவினா அணி தோற்கடித்துள்ளது.

இந்த போட்டியின் முதல் பாதியில் போஸ்னியா-ஹெர்சகோவினா அணி 2 கோல்களையும், கட்டார் அணி ஒரு கோலையும் பெற்றிருந்தன.

ஆட்டத்தின் 29ஆவது நிமிடத்தில் ஐ. பாசிக்கின் (I. Bašić) உதவியுடன் போஸ்னியா அணியின் கே. அலஜ்பெகோவிக் (K. Alajbegović) முதல் கோலை அடித்தார்.

தொடர்ந்து 34ஆவது நிமிடத்தில் கட்டார் அணியின் மஹ்மூத் அபுநாடா (Mahmud Abunada) சொந்த கோல் (Own Goal) அடித்ததன் மூலம் போஸ்னியா அணிக்கு இரண்டாவது கோல் கிடைத்தது.

அதன்பின்னர் ஆட்டத்தின் 42ஆவது நிமிடத்தில் எட்மில்சன் ஜூனியரின் (Edmílson Junior) உதவியுடன் கட்டார் அணியின் ஹசன் அல் ஹைதோஸ் (Hassan Al Haydos) ஒரு கோலை அடித்தார். இதன்படி முதற்பாதி ஆட்டம் 2 - 1 என முடிவடைந்தது.

தொடர்ந்து நடைபெற்ற இரண்டாம் பாதி ஆட்டத்தின் 80ஆவது நிமிடத்தில், டி. ஹாட்ஸிகாடுனிக்கின் (D. Hadžikadunić) உதவியுடன் போஸ்னியா அணியின் ஈ. மஹ்மிக் (E. Mahmić) மூன்றாவது கோலை அடித்து அணியின் வெற்றியை உறுதி செய்தார்.

அதன்படி, ஆட்டநேர முடிவில் போஸ்னியா-ஹெர்சகோவினா அணி 3 - 1 என்ற கோல் கணக்கில் வெற்றி பெற்றது.

இந்தத் தோல்வியைத் தொடர்ந்து, நடப்பு உலகக் கிண்ணத் தொடரிலிருந்து வெளியேறும் ஆறாவது அணியாக கட்டார் மாறியுள்ளது.

இதேவேளை, இந்த வெற்றியின் மூலம் 4 புள்ளிகளைப் பெற்றுள்ள போஸ்னியா-ஹெர்சகோவினா அணி அடுத்த சுற்றுக்கு (இரண்டாம் சுற்று) முன்னேறுவதற்கான அதிக வாய்ப்பைப் பெற்றுள்ளமை குறிப்பிடத்தக்கது.