எதிர்ப்பாளர்களை எதிரிகளாகப் பார்க்கும் அரசாங்கம் - நாமல் ராஜபக்ஷ முழக்கம்!

எதிர்ப்பாளர்களை எதிரிகளாகப் பார்க்கும் ஒரு அரசியல் சட்டகத்திற்குள்தான் அடுத்த அரசியல் சக்திக்குத் தயாராக வேண்டியுள்ளது என்று நாடாளுமன்ற உறுப்பினர் நாமல் ராஜபக்ஷ தெரிவித்துள்ளார்.

இன்று யாராவது அரசாங்கத்திற்கு எதிராகப் பேசினால் அவர் ஊழல்வாதி அல்லது திருடன் எனவும், நெல்லுக்கு நல்ல விலை கேட்டு வீதியில் இறங்கும் விவசாயிகள் குடிகாரர்களாகவும், தங்களின் தொழில்முறை கௌரவத்தைப் பாதுகாக்க முன்வரும் மருத்துவர்கள், சட்டத்தரணிகள் திருடர்களாகவும் சித்திரிக்கப்படுவதாக அவர் குறிப்பிட்டுள்ளார்.

தேர்தல் காலத்தில் அளவில்லாத பொய்களைக் கூறி, பட்டதாரிகளுக்கு வேலைவாய்ப்பு மற்றும் நெல்லுக்கு 150 ரூபா கொள்வனவு விலை போன்ற எதிர்பார்ப்புகளை வழங்கி விவசாய மக்களை ஏமாற்றிய அரசாங்கம், தற்போது உரம் மற்றும் உரிய விலையை வழங்காது, நெல் அறுவடை காலத்தில் வெளிநாட்டுப் பழங்கள் மற்றும் காய்கறிகளை இறக்குமதி செய்கிறது என்றும், எரிபொருள் நிவாரணம் இல்லாததால் கடற்றொழில் மக்கள் தங்களின் வாழ்வாதாரத்தை இழக்கும் நிலைக்குத் தள்ளப்பட்டுள்ளனர் என்றும் அவர் சுட்டிக்காட்டியுள்ளார்.

அதேபோல், கேகாலை பகுதியில் இளைஞர்கள் மீது காவல்துறையினரால் திட்டமிட்டு அநீதி இழைக்கப்பட்டுள்ளதாகக் குற்றம் சாட்டியுள்ள அவர், சட்டத்தை வளைக்கும் அதிகாரிகள் தங்களின் இறுதி நிலையைப் புரிந்துகொண்டு செயற்பட வேண்டும் என எச்சரித்துள்ளார்.

மேலும், புத்தளம் மாவட்டத்தில் பௌத்த மற்றும் கத்தோலிக்க மக்களிடையே பிளவை ஏற்படுத்த அரசாங்கம் முயற்சிப்பதாகவும், உயிர்த்த ஞாயிறு தாக்குதல் விபரங்கள் அடங்கிய புலனாய்வு அறிக்கைகளை மூடி மறைத்தவர்களுக்குப் பதவியுயர்வுகளும், தீவிரவாதிகளுக்காகக் குரல் கொடுத்தவர்களுக்கு அரசாங்கப் பதவிகளும் வழங்கப்படும் அதேவேளை, தகவல்களை வழங்கிய சிவில் குடிமகன் சிறைக்கு அனுப்பப்படுவதாகவும் அவர் தெரிவித்துள்ளார்.

அத்துடன், 'பௌத்த மக்கள் நாகதீபத்திற்கு வரத் தேவையில்லை, அனுராதபுரத்துடன் நிறுத்திக் கொள்ள வேண்டும்' என ஜனாதிபதி யாழ்ப்பாணத்தில் குறிப்பிட்ட கூற்றானது, அவர் எந்தளவுக்குக் கீழ்மட்ட நிலைக்கு வீழ்ந்துள்ளார் என்பதைக் காட்டுவதாகவும், துன்பங்கள் தாளாது மக்கள் வீதிக்கு வரும்போது அவர்களை ஒடுக்குவதற்கே அரசாங்கம் முற்படுகிறது எனவும் நாடாளுமன்ற உறுப்பினர் நாமல் ராஜபக்ஷ பலத்த விமர்சனங்களை முன்வைத்துள்ளார்.