நீர்கொழும்பில் இருந்து மாற்றப்பட்ட கைதிகளின் பாதுகாப்பை கோரும் உரிமைகள் அமைப்பு

நீர்கொழும்பு சிறையிலிருந்து மாற்றப்பட்ட கைதிகள் மற்ற சிறைகளில் கடுமையான உடல்ரீதியான தாக்குதல்களுக்கு உள்ளாக்கப்படுவதாக கைதிகளின் உரிமைகளைப் பாதுகாக்கும் குழு குற்றம் சுமத்தியுள்ளது.

நேற்று இரவு வெளியிடப்பட்ட அவசர அறிவிப்பில் இது தொடர்பில் தங்களுக்குத் தொடர்ச்சியான தகவல்கள் கிடைத்துள்ளதாக அந்த அமைப்பு தெரிவித்துள்ளது.

அங்குனகொலப்பலெஸ்ஸா சிறைக்கு மாற்றப்பட்ட கைதிகள் கடுமையாகத் தாக்கப்பட்டதாகவும் அவர்களில் சிலருக்குக் கால் முறிவுகள் மற்றும் முதுகில் வெட்டுக்காயங்கள் உள்ளிட்ட கடுமையான காயங்கள் ஏற்பட்டதாகவும் கைதிகளின் உரிமைகளைப் பாதுகாக்கும் குழு தெரிவித்துள்ளது.

வெலிக்கடை சிறைக்கு மாற்றப்பட்ட கைதிகள் மீது தாக்குதல்களை நடத்துவதற்கான ஏற்பாடுகள் நடைபெற்று வருவதாகவும் அந்த அமைப்பு எச்சரித்துள்ளது.

இதுபோன்ற தாக்குதல்களை உடனடியாகத் தடுத்து நிறுத்தவும் காயமடைந்த கைதிகளுக்கு உடனடி மருத்துவ சிகிச்சை கிடைப்பதை உறுதி செய்யவும் நீர்கொழும்பு சிறையிலிருந்து மாற்றப்பட்ட அனைத்து கைதிகளின் பாதுகாப்பிற்கும் உத்தரவாதம் அளிக்கவும் அதிகாரிகள் தலையிட வேண்டும் என கைதிகளின் உரிமைகளைப் பாதுகாக்கும் குழு வலியுறுத்தியுள்ளது.