பிரித்தானிய வெளியுறவு அமைச்சகத்தின் நாடாளுமன்றச் செயலாளராக இலங்கைத் தமிழரான உமா குமரன் நியமனம்!

இலங்கைத் தமிழ் ஏதிலி குடும்பத்தைச் சேர்ந்தவரும், பிரித்தானியாவின் 'ஸ்ட்ராட்ஃபோர்ட் அண்ட் போ' (Stratford and Bow) தொகுதி நாடாளுமன்ற உறுப்பினருமான உமா குமரன், பிரித்தானிய வெளியுறவு, காமன்வெல்த் மற்றும் மேம்பாட்டு அலுவலகத்தின் நாடாளுமன்ற பிரதிச் செயலாளராக நியமிக்கப்பட்டுள்ளார்.

பிரித்தானிய நாடாளுமன்ற வரலாற்றில் அமைச்சுப் பொறுப்பொன்றை ஏற்ற முதலாவது இலங்கைத் தமிழ் வம்சாவளிப் பெண் இவர் என்பது குறிப்பிடத்தக்கது.

தனது புதிய நியமனம் குறித்து சமூக ஊடகத்தில் பதிவொன்றை வெளியிட்டுள்ள உமா குமரன், உலகளவில் பதற்றமும் சவால்களும் நிறைந்த இந்தக் காலகட்டத்தில், பிரித்தானியாவின் சர்வதேச தலைமைத்துவத்தையும் வெளியுறவுக் கொள்கையையும் பிரதிநிதித்துவப்படுத்தி நாட்டிற்குச் சேவை செய்யக் கிடைத்த வாய்ப்பு தனக்குக் கிடைத்த பெரும் கௌரவம் எனத் தெரிவித்துள்ளார்.

கிழக்கு லண்டனில் பிறந்த உமா குமரனின் பெற்றோர், இலங்கையில் இடம்பெற்ற உள்நாட்டுப் போரின் போது ஏதிலிகளாக பிரித்தானியா சென்றடைந்தனர்.

அக்காலகட்டத்தில் தொழிற்கட்சி நாடாளுமன்ற உறுப்பினராக இருந்த ஜெரமி கார்பினின் தலையீட்டின் மூலமே அவர்களுக்குப் பிரித்தானியாவில் குடியுரிமை கிடைத்தது.

இவர் லண்டன் குயின் மேரி பல்கலைக்கழகத்தில் அரசியல் அறிவியலில் இளங்கலைப் பட்டத்தையும், பொதுக் கொள்கையில் முதுகலைப் பட்டத்தையும் பெற்றுள்ளார்.