உலகளவில் வேகமாக முன்னேறும் நாடுகளில் இலங்கைக்கு 4ஆம் இடம்!

சர்வதேச நிதி நிறுவகத்தின் (Institute of International Finance) 2026 ஆம் ஆண்டுக்கான முதலீட்டாளர் உறவுகள் மற்றும் கடன் வெளிப்படைத்தன்மை அறிக்கையின்படி, உலகின் வேகமாக முன்னேறிவரும் நாடுகளில் ஒன்றாக இலங்கை பெயரிடப்பட்டுள்ளது.

கடனை மறுசீரமைத்ததைத் தொடர்ந்து சர்வதேச நம்பிக்கையை மீளக் கட்டியெழுப்பும் அரசாங்கத்தின் முயற்சிகளுக்கு மத்தியில், உலகளவில் மிகப்பெரிய முன்னேற்றமடைந்த நாடுகளின் பட்டியலில் இலங்கை நான்காவது இடத்தைப் பிடித்துள்ளமை குறிப்பிடத்தக்க மைல்கல்லாகும்.

மதிப்பீடு செய்யப்பட்ட 57 வளர்ந்து வரும் சந்தைகள் மற்றும் மேம்பட்டுவரும் பொருளாதாரங்களில் இலங்கை முதல் கால்பகுதிக்குள் இடம்பிடித்துள்ளது.

குறித்த தரவரிசையில் வியட்நாம் முதலாம் இடத்தையும், பெலிஸ் இரண்டாம் இடத்தையும், மொசாம்பிக் மூன்றாம் இடத்தையும் பெற்றுள்ளன.

இலங்கையின் ஒட்டுமொத்த முதலீட்டாளர் உறவுகளுக்கான புள்ளி 2025 ஆம் ஆண்டில் 37.33 ஆக இருந்த நிலையில், 2026 ஆம் ஆண்டில் 43.67 ஆகக் கணிசமாக உயர்ந்துள்ளது.

கடன் வெளிப்படைத்தன்மை மற்றும் முதலீட்டாளர் உறவுகள் ஆகிய துறைகளில் இலங்கை குறிப்பிடத்தக்க முன்னேற்றத்தைக் பதிவு செய்துள்ளதாக சர்வதேச நிதி நிறுவகம் சுட்டிக்காட்டியுள்ளது.

அதேநேரம், நிதிசார் நிர்வாகம் மற்றும் முதலீட்டாளர்களின் நம்பிக்கையை வலுப்படுத்துவதற்கான தொடர்ச்சியான முயற்சிகளின் பிரதிபலனாக, கடன் வெளிப்படைத்தன்மைக்கான உலகளாவிய தரவரிசையில் இலங்கையானது ஐந்தாவது இடத்திற்கு முன்னேறியுள்ளமையும் குறிப்பிடத்தக்கது.