எல் நினோ தாக்கம்: குடிநீர் குறித்து வெளியான முக்கிய அறிவிப்பு

நாட்டின் முக்கிய நீர்த்தேக்கங்களிலிருந்து குடிநீரைப் பெறும் தேசிய நீர் வழங்கல் மற்றும் வடிகாலமைப்புச் சபை, தற்போது தனது அதிகபட்ச உற்பத்தித் திறனில் தொடர்ந்து செயல்பட்டு வருவதாக அதன் தலைவர் சந்தன பண்டார தெரிவித்துள்ளார்.

மேலும், நீர்த்தேக்கங்களை நிர்வகிக்கும் நீர்ப்பாசனத் திணைக்களமும் மகாவலி அதிகாரசபையும் இதுவரை நீர் எடுப்பதற்கு எந்தக் கட்டுப்பாடுகளையும் விதிக்காததால், குடிநீர் விநியோகத்தைக் கட்டுப்படுத்த வேண்டிய அவசியம் ஏற்படவில்லை என்றும் அவர் குறிப்பிட்டார்.

எனினும், எதிர்காலத்தில் நீர்த்தேக்கங்களின் நீர்மட்டம் கணிசமாகக் குறைந்து, சம்பந்தப்பட்ட அதிகாரிகள் நீரைப் பெற்றுக்கொள்வதற்கு கட்டுப்பாடுகளை விதித்தால், அப்போதைய நிலைமையை மதிப்பீடு செய்து குடிநீர் விநியோகக் கட்டுப்பாடுகள் குறித்து தீர்மானிக்கப்படும் என்றும் அவர் தெரிவித்தார்.

தற்போதைய காலநிலைச் சூழலை எதிர்கொள்ளும் வகையில், நிலத்தடி நீரை அதிகளவில் பயன்படுத்துவதற்காக உள்ளகக் குழாய்க் கிணறு அமைப்புகளை மேம்படுத்தும் பணிகள் உள்ளிட்ட விசேட நடவடிக்கைகள் ஏற்கனவே முன்னெடுக்கப்பட்டுள்ளதாகவும் சந்தன பண்டார கூறினார்.

மேலும், இந்தச் சவாலான காலப்பகுதி முடிவடையும் வரை குடிநீரை சிக்கனமாகப் பயன்படுத்தி, தேவையற்ற வீணாக்கத்தைத் தவிர்க்குமாறு பொதுமக்களிடம் அவர் கேட்டுக்கொண்டார்.

இதற்கிடையில், வளிமண்டலவியல் திணைக்களத்தின் முன்னறிவிப்பின்படி, அம்பாறை, மட்டக்களப்பு, திருகோணமலை, ஹம்பாந்தோட்டை மற்றும் மொனராகலை மாவட்டங்களில் ஏற்கனவே வறட்சி நிலை பதிவாகியுள்ளது.

அதேவேளை, எதிர்வரும் செப்டம்பர் மாதத்திற்குப் பின்னர் மழை நிலைமையில் முன்னேற்றம் ஏற்படும் என எதிர்பார்க்கப்படுகின்ற போதிலும், 2027ஆம் ஆண்டு ஜனவரி முதல் ஏப்ரல் வரையிலான காலப்பகுதியில் வறட்சியின் தாக்கம் மேலும் தீவிரமடையக்கூடும் என்றும், அதனை தற்போதைய முன்னறிவிப்புகள் சுட்டிக்காட்டுவதாக தேசிய நீர் வழங்கல் மற்றும் வடிகாலமைப்புச் சபையின் தலைவர் தெரிவித்துள்ளார்.