பிரித்தானிய அரச குடும்பத்தில் புதிய மகிழ்ச்சி - இளவரசி யூஜினிக்கு பெண் குழந்தை

அரச குடும்பம் வெளியிட்ட தகவலின்படி, குழந்தை திங்கட்கிழமை மாலை 6.20 மணிக்கு பிறந்ததுடன், பிறக்கும் போது 6 பவுண்டு 9 அவுன்ஸ் எடை கொண்டிருந்ததாக தெரிவிக்கப்பட்டுள்ளது.

36 வயதான இளவரசி யூஜினிக்கும் அவரது கணவர் ஜாக் புரூக்ஸ்பாங்கிற்கும் இது மூன்றாவது குழந்தையாகும்.

இவர்களுக்கு ஏற்கனவே 2021ஆம் ஆண்டு பிறந்த ஓகஸ்ட் பிலிப் ஹாக் புரூக்ஸ்பாங்க் மற்றும் 2023ஆம் ஆண்டு பிறந்த எர்னஸ்ட் ஜோர்ஜ் ரோனி புரூக்ஸ்பாங்க் ஆகிய இரண்டு ஆண் குழந்தைகள் உள்ளனர்.

புதிய குழந்தையின் பெயர் இதுவரை அறிவிக்கப்படவில்லை.

இந்த மகிழ்ச்சியான செய்தி தொடர்பில், மன்னர் சார்ல்ஸ் மற்றும் அரசி கமிலா உள்ளிட்ட அரச குடும்ப உறுப்பினர்கள் தமது மகிழ்ச்சியைத் தெரிவித்துள்ளதாக பக்கிங்ஹாம் அரண்மனை வெளியிட்டுள்ள அறிக்கையில் குறிப்பிடப்பட்டுள்ளது.

இதனிடையே, இளவரசி யூஜினி தனது இன்ஸ்டாகிராம் பதிவில், "எங்கள் பெண் குழந்தையின் வருகையை மகிழ்ச்சியுடன் அறிவிக்கிறோம். எங்கள் மகளை அளவற்ற அன்புடன் வரவேற்கிறோம்" என்று தெரிவித்துள்ளார்.

மேலும், புதிய குழந்தை பிரித்தானிய அரச அரியணை வாரிசுரிமைப் பட்டியலில் 15ஆவது இடத்தை பெறுவார் என்றும், அவருக்கு HRH (His/Her Royal Highness) என்ற அரச மரியாதைப் பட்டம் வழங்கப்படமாட்டாது என்றும் தெரிவிக்கப்பட்டுள்ளது.