கொழும்பு போக்குவரத்தில் மாற்றம் - 7 புதிய மெட்ரோ பேருந்து பாதைகள் அறிமுகம்!

இலங்கையின் நகர்ப்புற பொதுப் போக்குவரத்து அமைப்பை நவீனமயமாக்கும் நடவடிக்கையின் ஒரு பகுதியாக, கொழும்பு பெருநகரப் பகுதி முழுவதும் 7 புதிய மெட்ரோ பேருந்து பாதைகளை லங்கா மெட்ரோ டிரான்சிட் நிறுவனம் அறிமுகப்படுத்தியுள்ளது.

போக்குவரத்து, நெடுஞ்சாலைகள் மற்றும் நகர்ப்புற அபிவிருத்தி அமைச்சின் கீழ் இயங்கும் அரசாங்கத்திற்குச் சொந்தமான நிறுவனமான லங்கா மெட்ரோ டிரான்சிட், இந்த புதிய சேவைகள் மூலம் பயணிகளுக்கு இலகுவான போக்குவரத்து வசதிகளை வழங்கவுள்ளது.

அதன்படி மாக்கும்புர - கொழும்பு கோட்டை, மில்லேனியம் சிட்டி - கொழும்பு கோட்டை,கடவத்தை - மாக்கும்புர,தெமட்டகொட - பாணந்துறை,பத்தரமுல்லை - ஏக்கல,கொள்ளுப்பிட்டி வட்டாரப் பாதை ,கெஸ்பேவ - புறக்கோட்டை ஆகிய பாதைகளின் ஊடாக இந்த பேருந்து சேவைகள் புதிதாக அறிமுகப்படுத்தப்பட்டுள்ளன.

இந்த புதிய மெட்ரோ பேருந்து பாதைகள் கொழும்பு மற்றும் அதனைச் சுற்றியுள்ள பகுதிகளின் போக்குவரத்து நெரிசலைக் குறைத்து, பயணிகளின் நேரத்தை மீதப்படுத்த உதவும் என எதிர்பார்க்கப்படுகிறது.