ஐரோப்பாவில் அரிதான முழு சூரிய கிரகணம்: கோடிக்கணக்கான மக்கள் வியப்புடன் பார்வையிட்டனர்!

ஐரோப்பியக் கண்டத்தின் பல பகுதிகளில் நேற்று (12) அரிய வகை முழுச் சூரிய கிரகணம் தென்பட்டது. இதன்போது சூரியனை நிலவு முழுமையாக மறைத்ததால், பல பகுதிகள் பகல் வேளையிலேயே இருளில் மூழ்கின.

இந்த அரிய வான் நிகழ்வைக் காண்பதற்கு ஸ்பெயின் உட்படப் பல்வேறு ஐரோப்பிய நாடுகளில் கோடிக்கணக்கான மக்கள் திரண்டனர்.

கிரீன்லாந்து, ஐஸ்லாந்து மற்றும் வடக்கு ஸ்பெயின் ஆகிய பகுதிகளைக் கடந்து இந்த முழுச் சூரிய கிரகணம் பயணித்தது. ஐரோப்பிய பிரதான நிலப்பரப்பில் கடந்த 1999ஆம் ஆண்டு ஆகஸ்ட் 11ஆம் திகதிக்குக்குப் பிறகு தென்பட்ட முதல் முழுச் சூரிய கிரகணம் இதுவாகும்.

சூரியன், நிலவு மற்றும் பூமி ஆகிய மூன்றும் ஒரே நேர்கோட்டில் வரும்போது, நிலவு சூரியனை மறைப்பதால் இந்த நிகழ்வு ஏற்படுகிறது.

ஸ்பெயின் நாட்டில் முழுச் சூரிய கிரகணத்தைக் காண்பதற்காகக் கோடிக்கணக்கான மக்கள் திரண்டனர். நாட்டின் பல நகரங்கள் மற்றும் திறந்தவெளி மைதானங்களில் கூடிய மக்கள், தெளிவான வானிலைக்கு மத்தியில் சில நிமிடங்கள் நிலவிய இருளை வியப்புடன் கண்டுகளித்தனர்.

அத்துடன், சுவிட்சர்லாந்தின் வடமேற்குப் பகுதியில் உள்ள 'சாசரல்' (Chasseral) மலைப்பகுதி உட்படப் பல இடங்களில் கூடி, நிலவு சூரியனின் ஒரு பகுதியை மறைத்த பகுதிச் சூரிய கிரகணத்தை மக்கள் பார்வையிட்டனர்.

மேலும் , பிரித்தானியாவில் 90 சதவீதத்துக்கும் அதிகமான அளவு சூரியனை நிலவு மறைத்த நிலையில், பகுதிச் சூரிய கிரகணம் தெளிவாகத் தென்பட்டது. லண்டனில் உள்ள புகழ்பெற்ற 'பிக் பென்' (Big Ben) மணிக்கூட்டு கோபுரத்தின் பின்னணியில் கிரகணம் மிக அழகாகக் காட்சியளித்தது.

மேலும், பர்மிங்ஹாமில் நடைபெற்ற ஐரோப்பிய தடகள செம்பியன்ஷிப் போட்டியின் இடையேயும் ரசிகர்கள் இதனை ரசித்தனர். ஹங்கேரியின் அகாட் (Agard) பகுதியில் உள்ள அவதானிப்புக் கோபுரத்தில் கூடிய வானியல் ஆர்வலர்கள் பகுதிச் சூரிய கிரகணத்தைக் கண்டுகளித்தனர்.