தலவாக்கலை – லெந்தோம்ஸ் தோட்டத்தில் குளவிக் கொட்டுக்கு இலக்கான ஒருவர் உயிரிழப்பு

குளவிக் கொட்டுக்கு இலக்கான மேலும் 03 பேர் சிகிச்சைப் பெற்று வீடு திரும்பியுள்ளதாக லிந்துலை பிரதேச மருத்துவமனையின் பேச்சாளர் ஒருவர் குறிப்பிட்டார்.

தலவாக்கலை, லிந்துலை ஓல்ட்ரீம் தோட்டத்தில் தேயிலைத் தோட்டப் பணியில் ஈடுபட்டிருந்த தொழிலாளர்களே குளவி கொட்டுக்கு இலக்காகியுள்ளனர்.

குளவி கொட்டுக்கு இலக்காகி காயமடைந்த 77 வயதான சுப்பிரமணியம் தாமோதரம் என்ற தொழிலாளர், லிந்துலை பிராந்திய மருத்துவமனையில் அனுமதிக்கும்போது உயிரிழந்ததாக லிந்துலை பொலிஸார் தெரிவித்துள்ளனர்.

சீரற்ற காலநிலை காரணமாக தேயிலைத் தோட்டத்தில் உள்ள குளவிக் கூடு ஒன்று கலைந்து, அங்கு பணியாற்றிக் கொண்டிருந்த தொழிலாளர்களை குளவிகள் தாக்கியதாக பொலிஸார் தெரிவித்துள்ளனர்.

உயிரிழந்தவரின் உடலம் பிரேதப் பரிசோதனைக்காக நுவரெலியா மாவட்ட பொது மருத்துவமனைக்கு அனுப்பி வைக்கப்பட்டுள்ளது.