22ஆவது அரசியலமைப்புத் திருத்தம்: உயர்நீதிமன்றத்தின் வியாக்கியானம் இன்று நாடாளுமன்றத்தில் அறிவிப்பு!

22ஆவது அரசியலமைப்புத் திருத்தச் சட்டமூலம் தொடர்பான உயர்நீதிமன்றத்தின் வியாக்கியானத்தை சபாநாயகர் ஜகத் விக்கிரமரத்ன இன்று நாடாளுமன்றத்தில் அறிவிக்கவுள்ளார்.உயர்நீதிமன்றத்தின் வியாக்கியானம் சபாநாயகரிடம் நேற்று கையளிக்கப்பட்டதாக சபாநாயகர் அலுவலகம் தெரிவித்துள்ளது.

இதற்கமைய, குறித்த வியாக்கியானம் தொடர்பான அறிவிப்பை சபாநாயகர் இன்று நாடாளுமன்றத்தில் வெளியிடவுள்ளார்.

இதேவேளை, இலங்கை பட்டய ஊடகத் தொழில்சார் நிபுணர்கள் நிறுவன சட்டமூலத்தை இந்த வாரம் நாடாளுமன்றத்தில் சமர்ப்பிக்காதிருக்க அரசாங்கம் தீர்மானித்துள்ளது.

குறித்த சட்டமூலம் தொடர்பான இரண்டாம் வாசிப்பு விவாதம் நாளை முற்பகல் 11.30 முதல் மாலை 5 மணி வரை நடைபெற முன்னதாகத் திட்டமிடப்பட்டிருந்தது.

எனினும், பல ஊடக அமைப்புகள் எதிர்ப்புகளை வெளியிட்டுள்ள நிலையில், பிரதி சபாநாயகர் ரிஸ்வி சாலி தலைமையிலான நாடாளுமன்ற அலுவல்கள் குழு, சட்டமூலம் மீதான விவாதத்தை காலவரையின்றி ஒத்திவைக்கத் தீர்மானித்துள்ளது.

இதற்குப் பதிலாக, விவாதிக்கத் திட்டமிடப்பட்டிருந்த ஏற்றுமதி விவசாய ஊக்குவிப்பு சட்டமூலம் நாளை விவாதிக்கப்படவுள்ளது.

அத்துடன், பெற்றோலிய வளங்கள் சட்டத்தின் கீழான கட்டளை இன்று விவாதிக்கப்படவுள்ளது.

இதேவேளை, மின்சாரக் கட்டணங்கள் தொடர்பில் மக்களுக்கு நிவாரணம் வழங்குவதற்காக 17 ஆயிரத்து 213 மில்லியன் ரூபாய் நிதி மானியத்தை வழங்குவதற்கான குறைநிரப்புப் பிரேரணை இன்று நாடாளுமன்றத்தில் சமர்ப்பிக்கப்படவுள்ளது.

இதனிடையே, அரசியலமைப்புத் திருத்தச் சட்டமூலம் தொடர்பான விவாதம் எதிர்வரும் 24 மற்றும் 25ஆம் திகதிகளில் நடைபெறவுள்ளது.

எதிர்வரும் 24ஆம் திகதி நாடாளுமன்றத்திற்கு அருகில் எதிர்ப்பு ஆர்ப்பாட்டமொன்றை நடத்துவதற்கும் எதிர்க்கட்சிகள் திட்டமிட்டுள்ளமை குறிப்பிடத்தக்கது.