இணையத்தை கலக்கும் சாய் அபயங்கரின் 'ரதிமா' - 30 இலட்சம் பார்வைகளைக் கடந்து வரவேற்பு!

சமீப காலமாக தனியிசைப் பாடல்களுக்கு ரசிகர்கள் மத்தியில் வரவேற்பு அதிகரித்து வரும் நிலையில், தனியிசை ஆல்பங்கள் மூலம் பிரபலமடைந்து தற்போது முன்னணி இசையமைப்பாளராக வலம் வருபவர் சாய் அபயங்கர்.

இவரது 'கட்சி சேர', 'ஆச கூட' உள்ளிட்ட ஆல்பம் பாடல்கள் பெரும் வரவேற்பைப் பெற்றன. அதனைத் தொடர்ந்து, இவரது முந்தைய தனியிசை ஆல்பமான 'பவழமல்லி'யும் ஹிட்டானது.

இந்த வரிசையில், சாய் அபயங்கரின் 6ஆவது தனியிசை ஆல்பமாக 'ரதிமா' தற்போது வெளியாகியுள்ளது.

இந்தப் பாடலுக்கு சாய் அபயங்கரே இசையமைத்து பாடியுள்ளதோடு வரிகளை விவேக் எழுதியுள்ளார். இந்த ஆல்பத்தை தேஜோ இயக்கியுள்ளார்.

பொதுவாக சாய் அபயங்கரின் ஆல்பங்களில் இடம்பெறும் நடிகைகளும் பரவலாக அறியப்படுவது வழக்கம். அந்த வகையில், இந்த ஆல்பத்தில் நடிகை பாக்யஸ்ரீ போர்ஸ் சாய் அபயங்கருடன் இணைந்து நடித்துள்ளார்.

யுடியூப்பில் வெளியான இந்த ஆல்பப் பாடல், வெளியான 20 மணி நேரத்திற்குள் 30 இலட்சம் பார்வைகளைப் பெற்றுள்ளதாகத் தகவல்கள் தெரிவிக்கின்றன.