ද්විපාර්ශවික සබඳතා ශක්තිමත් කිරීමට ඉන්දු - දකුණු කොරියානු නායකයෝ එකඟවෙති

ඉන්දියාව සහ දකුණු කොරියානු ජනරජය අතර මූලෝපායික හවුල්කාරිත්වය ආරක්ෂක සහයෝගීතාව, ආර්ථික ආරක්ෂාව, කාර්මික සහයෝගීතාව සහ නැගී එන තාක්ෂණයන් කෙරෙහි අවධානය යොමු කරමින් සැලකිය යුතු ලෙස ශක්තිමත් කිරීමට දෙපාර්ශවය එකඟතාවකට පැමිණි තිබෙනවා.

ඒ, දකුණු කොරියානු ජනාධිපති ලී ජේ-මියුන්ග්ගේ ඉන්දීය සංචාරයට සමගාමීව ඔහු ඉන්දීය අග්‍රාමාත්‍ය නරේන්ද්‍ර මෝදි හමුවී සිදු කළ ද්විපාර්ශවික සාකච්ඡා වටයේදීයි.

නිදහස්, විවෘත සහ නීති මත පදනම් වූ ඉන්දු-පැසිෆික් කලාපයක් පිළිබඳ ඔවුන්ගේ පොදු දැක්ම මෙහිදී යළිත් තහවුරු කර තිබෙනවා.

අවුරුදු අටකට පසු දකුණු කොරියානු ජනාධිපතිවරයෙකු ඉන්දියාවට පැමිණෙන පළමු අවස්ථාව සනිටුහන් කරමින්, ඉන්දීය අග්‍රාමාත්‍ය නරේන්ද්‍ර මෝදි දකුණු කොරියානු ජනාධිපති ලී සිය පළමු ඉන්දීය සංචාරය සඳහා සාදරයෙන් පිළිගනු ලැබුවා.

එහිදී දෙරට අතර පවතින පොදු සාරධර්ම සහ ඉන්දු-පැසිෆික් කලාපය පිළිබඳ පොදු දැක්ම ඔහු අවධාරණය කළා.

කලාපීය සහ ගෝලීය මූලෝපායික වර්ධනයන් පිළිබඳව සමීප සම්බන්ධීකරණයකින් කටයුතු කිරීමේ වැදගත්කම දෙපාර්ශවයම පෙන්වා දුන් අතර ජ්‍යෙෂ්ඨ නිලධාරීන් අතර පවතින ආයතනික සංවාද යාන්ත්‍රණයන් පුළුල් කිරීමට ද මෙහිදී එකඟ වී තිබෙනවා.

ආරක්ෂක කර්මාන්ත සහයෝගීතා රාමු යටතේ සැලසුම් කර ඇති රැස්වීම් සහ විදේශ හා ආරක්ෂක නිලධාරීන් අතර උප ඇමති මට්ටමින් යෝජිත 2+2 සංවාදයක් ද මීට ඇතුළත්.