මාමඩල ඝාතන සිද්ධියේ ප්‍රධාන සැකකරු කොටුවෙයි

අම්බලන්තොට මාමඩල බොකුටයාය ප්‍රදේශයේදී පුද්ගලයෙකුගේ ගෙල කපා මාමඩල හන්දියේ පිළිරුවක එල්ලීමේ සිද්ධියේ ප්‍රධාන සැකකරු ඊයේ (21) රාත්‍රී අත්අඩංගුවට ගත් බව අම්බලන්තොට පොලිසිය පවසනවා.

මෙලෙස අත්අඩංගුවට ගෙන ඇත්තේ කරුණෙ ලොක්කා නමැති පුද්ගලයෙකු වන අතර ඔහුට අපරාධ නඩු කිහිපයක් සම්බන්ධයෙන් අධිකරණයෙන් වරෙන්තු නිකුත් කර තිබෙන බවයි පොලිසිය පැවසුවේ.

පසුගිය 11 වැනිදා රාත්‍රියේ මෙලස ඝාතනයට ලක්කර තිබුණේ අංක 396 ,බොකුටුයාය,මාමඩල ,අම්බලන්තොට ලිපිනයේ පදිංචි වීරසේකර ආරච්චිගේ ලක්මාල් සඳරුවන් නමැති අයයි.

ඔහු ඝාතනය කිරීමෙන් පසු ඔහුගේ ගෙල අම්බලන්තොට මාමඩල හන්දියේ පිහිටි රත්නාවලි දේවියගේ පිළිරුවේ දෑත් මත තබා ගොස් තිබුණා.

ඝාතනයට ලක් වු පුද්ගලයා මීට පෙර මාමඩල ප්‍රදේශයේ සිදුවූ ත්‍රිත්ව ඝාතනයක් සම්බන්ධව අත්අඩංගුවට ගෙන රක්ෂිත බන්ධනාගාර ගතකර සිට පසුව අධිකරණයෙන් ඇප ලබා පැමිණ සිටි පුද්ගලයෙක්.

මෙම අපරාධ සිද්ධිය වාර්තා විමත් සමග ක්‍රියාත්මක වු අම්බලන්තොට පොලිසියේ නිලධාරීන් විසින් එක් සැකකරුවෙකු එම ප්‍රදේශයේදීම අත්අඩංගුවට ගත්තා.

පසුව තංගල්ල කොට්ඨාස අපරාධ විමර්ශන ඒකකයේ නිලධාරීන් විසින් සිද්ධියට සම්බන්ධ තවත් සැකකරුවන් දෙදෙනෙකු ලුණුගම්වෙහෙර ප්‍රදේශයේ සැඟව සිටියදී අත්අඩංගුවට ගැණුනු අතර ඔවුන් හම්බන්තොට මහෙස්ත්‍රාත් අධිකරණයට ඉදිරිපත් කිරීමෙන් පසු ජුනි මස 04 දින දක්වා රක්ෂිත බන්ධනාගාර ගත කළා.

පසුව සිද්ධිය සම්බන්ධයෙන් වැඩිදුරටත් පොලිසිය සිදුකළ විමර්ශනයේදී අනාවරණය වී තිබුණේ කරුණේ ලොක්කා නැමැත්තාද මේ සඳහා ආධාර අනුබල දී ඇති බවයි.

ඒ අනුව සැකකරු අත්අඩංගුවට ගැනිම සඳහා පොලිස් විමාර්ශන ආරම්භ කර තිබු අතර එහිදී තොරතුරක් ලැබී තිබුණේ සැකකරු මාමඩල ප්‍රදේශයේ සිටින බවටයි.

එහිදී වහා ක්‍රියාත්මක වු අම්බලන්තොට පොලිස් නිලධාරීන් ඊයේ (21) රාත්‍රි සැකකරු මාමඩල ප්‍රදේශයේදි අත්අඩංගුවට ගත්තා.

සැකකරුගෙන් ප්‍රකාශ ලබාගැනිමෙන් අනතුරුව ඔහු හම්බන්තොට මහේස්ත්‍රාත් අධිකරණයට ඉදිරිපත් කෙරුණා.