සෞඛ්‍ය වෘත්තිකයින් ඇගයීමට කාර්ය සාධනය පදනම් කරගත් නව ක්‍රමවේදයක්!

කාර්ය සාධනය පදනම් කර ගනිමින් සෞඛ්‍ය වෘත්තිකයින් ඇගයීමේ ක්‍රමවේදයක් සකස් කිරීම කෙරෙහි සෞඛ්‍ය අමාත්‍යාංශයේ අවධානය යොමුව තිබෙනවා.

රාජකාරි සීමාව ඉක්මවා කැපවීමෙන් කටයුතු කරන වෘත්තිකයින් ඇගයීම සඳහා වන නිශ්චිත පිළිගත් ක්‍රමවේදයක් මෙතෙක් සෞඛ්‍ය අමාත්‍යාංශය තුළ නොමැති බවත් එවැන්නක් හඳුන්වාදීම පිළිබඳව මේ වනවිට සාකච්ඡා කරමින් පවතින බවත් සෞඛ්‍ය නියෝජ්‍ය අමාත්‍ය වෛද්‍ය හංසක විජේමුණි පැවසුවා.

වකුගඩු බද්ධ කිරීමක්ද සමඟ පේරාදෙණිය ශික්ෂණ රෝහලේදී බද්ධ නිවුන් දරුවන් වෙන් කිරීමේ සැත්කමක් ලොව ප්‍රථම වතාවට සිදු කිරීම සඳහා දායකත්වය දැක්වූ වෛද්‍යවරු ඇතුළු සෞඛ්‍ය කාර්ය මණ්ඩලය ඇගයීමට සෞඛ්‍ය අමාත්‍යාංශය කටයුතු කරන්නේද යන්න සම්බන්ධයෙන් විමසූ අවස්ථාවේ ඊට පිළිතුරු දෙමින් නියෝජ්‍ය ඇමැතිවරයා මේ බව ප්‍රකාශ කළා.

වැටුප් වර්ධක හා උසස් වීම් ලබා දීමේදී තමන් නිරත වෘත්තියේ කර්ය සාධනය ඇගයීමට ලක් කිරීමේ ක්‍රමවේයදයක් ලොව පුරා ක්‍රියාත්මක වන බවත් කාර්ය සාධනය පදනම් කරගත් එවැනි ක්‍රමවේදයක් සෞඛ්‍ය අමාත්‍යාංශයේ නොතිබීම ගැටලුවක් බවත් ඔහු පැවසුවා.

සෞඛ්‍ය අමාත්‍යාංශය යටතේ එකිනෙකට වෙනස් වෘත්තීන් 280 ක් ක්‍රියාත්මක වන බව ද ඔහු සඳහන් කළා.

බද්ධ නිවුන් දරුවන් වෙන් කිරීමේ සැත්කම සඳහා දායකත්වය දැක්වූ පේරාදෙණිය ශික්ෂණ රෝහලේ හා සිරිමාවෝ බණ්ඩාරනායක විශේෂිත ළමා ‌රෝහලේ වෛද්‍යවරු ඇතුළු සෞඛ්‍ය කාර්ය මණ්ඩලය තම රාජකාරි සීමාවද ඉක්මවා යමින් කැපවීමෙන් හා උනන්දුවෙන් සේවා ලබාදී තිබෙන බවත් එවැනි අය අගය කිරීම තුළින් ඔවුන් දිරිමත් වනවා පමණක් නොව සෙසු අයටද එවැනි කැපකිරීමක් සිදු කිරීම සඳහා පෙළඹවීමක් ඇතිවනු ඇති බවත් නියෝජ්‍ය ඇමැතිවරයා ප්‍රකාශ කළා.