රුමේනියාවේ මහල් නිවාස සංකීර්ණයකට රුසියානු ඩ්‍රෝන යානයක් කඩා වැටෙයි

රුසියානු ඩ්‍රෝන යානයක් රුමේනියාවේ මහල් නිවාස සංකීර්ණයකට වැටී ඇති බව එරට ආරක්ෂක අමාත්‍යාංශය අද (29) අලුයම ප්‍රකාශ කර තිබෙනවා.

මේ හේතුවෙන් ගින්නක් හටගෙන ඇති අතර පුද්ගලයන් දෙදෙනෙකු තුවාල ලබා ඇති බව විදෙස් මාධ්‍ය වාර්තා කරනවා.

රුසියාව විසින් යුක්රේන දේශසීමාව ආසන්නයට ප්‍රහාර එල්ල කරන අතරතුර, මෙම ඩ්‍රෝන යානය නැගෙනහිර රුමේනියාවේ ගලාට්ස් (Galati) නගරයට කඩා වැටී ඇති බව ආරක්ෂක අමාත්‍යාංශය නිවේදනයක් නිකුත් කරමින් කියා තිබෙනවා.

රුමේනියානු හදිසි අවස්ථා පිළිබඳ පොදු පරීක්ෂක කාර්යාලය පැවසුවේ ඩ්‍රෝන යානයේ තිබූ සම්පූර්ණ පුපුරණ ද්‍රව්‍ය තොගයම එහිදී පුපුරා ගොස් ඇති අතර, ඉන් එම නේවාසික ගොඩනැගිල්ලේ 10 වැනි මහලේ ගින්නක් හටගත් බවයි.

යුක්රේනය සමග පවතින සිව්වසරක යුද්ධය අතරතුර නේටෝ සාමාජික රටක් වන රුමේනියාවේ දේශසීමාව හරහා රුසියානු ඩ්‍රෝන යානා කිහිප වතාවක්ම ගමන් කර ඇති නමුත්, රුමේනියානු පුරවැසියන් පිරිසක් තුවාල ලැබූ පළමු අවස්ථාව මෙය බවයි මාධ්‍ය වාර්තා සඳහන් කරන්නේ.

රුසියාව මෙතෙක් මෙම සිදුවීම සම්බන්ධයෙන් කිසිදු අදහස් දැක්වීමක් කර නොමැත.

හදිසි අනතුරු සේවා අංශ පැවසුවේ සීරීම් තුවාල ලැබූ පුද්ගලයන් දෙදෙනෙකුට වෛද්‍ය ප්‍රතිකාර ලබා දුන් බවත්, ගින්න නිවා දමන අතරතුර 70 දෙනෙකු පමණ ආරක්ෂිත ස්ථාන කරා ඉවත් කළ බවත්.

රුමේනියානු ගුවන් සීමාව තුළ ඩ්‍රෝන යානා නිරීක්ෂණය වීමෙන් පසුව එෆ්-16 (F-16) ප්‍රහාරක ජෙට් යානා දෙකක් කඩිනමින් පිටත් කර හැරීමට පියවර ගත් බව ආරක්ෂක අමාත්‍යාංශය පවසා තිබෙනවා.