චීන අපනයන ඉහළ යාම මැද චීන-යුරෝපා සංගම් සබඳතා පළුදු වෙයි - වැදගත් සාකච්ඡා දෙකක් චීනයෙන් හදිසියේම අවලංගු කෙරේ

චීන අපනයන ශීඝ්‍රයෙන් ඉහළ යාම හේතුවෙන් චීනය සහ යුරෝපා සංගමය අතර පවතින වෙළඳ සබඳතාවල දැඩි නොසන්සුන්කාරී තත්ත්වයක් හටගෙන තිබෙනවා.

මෙම පසුබිම මත, චීනය විසින් මේ මාසයේ පැවැත්වීමට නියමිතව තිබූ වැදගත් රාජ්‍යතාන්ත්‍රික සාකච්ඡා වට දෙකක් හදිසියේම අවලංගු කර ඇති බව ෆයිනෑන්ෂියල් ටයිම්ස් පුවත්පත වාර්තා කරන්නේ.

බීජිං නුවරදී පැවැත්වීමට සැලසුම් කර තිබූ මෙම සාකච්ඡා වට දෙකම චීනය විසින් අවලංගු කර ඇති බව අදාළ තොරතුරු දන්නා අභ්‍යන්තර ආරංචි මාර්ග උපුටා දක්වමින් එම වාර්තාවේ සඳහන්.

ඉන් එක් සාකච්ඡාවක් ඩිජිටල් ක්ෂේත්‍රයේ ගැටලු පිළිබඳව පැවැත්වීමට නියමිතව තිබූ අමාත්‍ය මට්ටමේ සාකච්ඡාවක් වන අතර, අනෙක යුරෝපීය බාහිර ක්‍රියාකාරී අංශයේ නියෝජ්‍ය මහලේකම් ඔලොෆ් ස්කූග්මගේ සහභාගීත්වයෙන් පැවැත්වීමට සැලසුම් කර තිබූවක්.

මෙම සාකච්ඡා දෙකම ඉතා කෙටි දැනුම්දීමකින් අවලංගු කිරීමට චීනය පියවර ගෙන තිබෙනවා.

සාකච්ඡා අවලංගු කිරීමට හේතුවක් බීජිං පාලනය විසින් මෙතෙක් අනාවරණය කර නොමැති වුවද, අනෙක් පාර්ශවයේ ප්‍රතිපත්ති පිළිබඳව පවතින අප්‍රසාදය පළ කිරීම සඳහා දෙපාර්ශවය විසින්ම මෙවැනි උපක්‍රම නිතර භාවිත කරනු ලබනවා.

පවතින වෙළඳ ආරවුල් රැසකට විසඳුම් සෙවීමේදී නිසි ප්‍රගතියක් අත්කර ගැනීමට අපොහොසත් වීම හේතුවෙන්, පසුගිය වසරේ ජූලි මාසයේ පැවැති රාජ්‍ය නායක සමුළුවට පෙර චීනය සමඟ පැවැත්වීමට තිබූ වැදගත් ආර්ථික සාකච්ඡාවක් ප්‍රතික්ෂේප කිරීමට ද යුරෝපා සංගමය කටයුතු කර තිබුණා.