''2026දී රුපියල 8%කින් බාල්දු වෙලා.. 2025 දීත් 5.6%කින් බාල්දු වෙලා''- මහ බැංකුව

2026 වසරේ ජනවාරි 01 වැනිදා සිට ජුනි 09 වැනිදා දක්වා වූ කාලය තුළ ශ්‍රී ලංකා රුපියල, අමෙරිකානු ඩොලරයට සාපේක්ෂව 8%ක පමණ අවප්‍රමාණ වීමක් පෙන්නුම් කරන බව ශ්‍රී ලංකා මහ බැංකුව පවසනවා.

පසුගිය 2025 වසරේදී ද රුපියල ඩොලරයට සාපේක්ෂව 5.6%කින් බාල්දු වූ අතර, මෙම වසරේ මුල් මාස දෙකේදී පමණක් 0.2%ක සුළු අගය ඉහළ යෑමක් වාර්තා වී තිබුණා.

මේ බව අනාවරණය වුණේ, මහ බැංකු අධිපති ආචාර්ය නන්දලාල් වීරසිංහගේ ප්‍රධානත්වයෙන්, වත්මන් ආර්ථික තත්ත්වය පිළිබඳව පාර්ලිමේන්තු මන්ත්‍රීවරුන් දැනුවත් කිරීම සඳහා පැවැත්වුණු විශේෂ වැඩසටහනකදී.

එහිදී මහ බැංකු අධිපතිවරයා පෙන්වා දුන්නේ, ඉන්ධන සහ වාහන ඇතුළු භාණ්ඩ සඳහා අධික ආනයන වියදමක් වැය වීම මෙන්ම සංචාරක කර්මාන්තය ඇතුළු ක්ෂේත්‍රවලින් විදේශ විනිමය රට තුළට ගලා ඒම අඩු වීම රුපියල පිරිහීමට ප්‍රධාන හේතු වූ බවයි.

මේ අතර රුපියල තවදුරටත් අවප්‍රමාණය වනු ඇතැයි අපේක්ෂාවෙන් අපනයනකරුවන් තමන් උපයන ඩොලර් ආදායම් රුපියල් බවට පත් කිරීම ප්‍රමාද කිරීමත්, ආනයනකරුවන් සිය ඇණවුම් කල්තියාම ඉහළ දමා ඩොලර් මිලදී ගැනීම වැඩි කිරීමත් මීට සෘජුවම බලපා ඇති බවද අධිපතිවරයා පෙන්වා දුන්නා.

එසේම රජයේ සුරැකුම්පත් සහ කොළඹ කොටස් හුවමාරුව හරහා විදේශීය ආයෝජන රටින් පිටතට ගලා යාම ද මෙලෙස රුපියලේ අගය පහත වැටීමට හේතු වී ඇති බවද ඔහු සඳහන් කළා.

මෙම කාලසීමාව තුළ ශ්‍රී ලංකා රුපියල සියයට 8කින් අවප්‍රමාණය වෙද්දී, කලාපීය අනෙකුත් රටවල මුදල් ඒකක ද ඩොලරයට සාපේක්ෂව අවප්‍රමාණය වී ඇති බව මහ බැංකුව වැඩිදුරටත් පවසා සිටියා.

ඒ අනුව ඉන්දුනීසියානු රුපියල සියයට 7.9කින් ද, ඉන්දියානු රුපියල සියයට 6.2කින් ද, නේපාල රුපියල සියයට 6කින් ද, පිලිපීන පෙසෝ සියයට 4.6කින් ද, තායිලන්ත බාත් සියයට 4.1කින් සහ මැලේසියානු රින්ගිට් සියයට 0.1කින් ද ඩොලරයට සාපේක්ෂව බාල්දු වී තිබෙනවා.