කේප් වර්ඩ් ගෝල් රකින්නාගේ මවට අමෙරිකානු වීසා බලපත්‍රයක් හිමිවෙයි

ලෝක පාපන්දු තරගාවලිය යටතේ ඉදිරියේදී පැවැත්වෙන තරඟයක් නැරඹීම සඳහා කේප් වර්ඩ් කණ්ඩායමේ සුපිරි ගෝල් රකින ක්‍රීඩක වොසින්හාගේ (Vozinha) මවට අමෙරිකා එක්සත් ජනපදයට ඇතුළු වීමට වීසා බලපත්‍රයක් තහවුරු කර ඇති බව අමෙරිකානු නියෝජිත මන්ත්‍රී මණ්ඩලයේ ඩිමොක්‍රටික් පක්ෂ නායක හකීම් ජෙෆ්රිස් නිවේදනය කර තිබෙනවා.

ඒ අනුව, වොසින්හාගේ මව වන ඇනා කැන්ඩිඩා එවෝරා සහ ඇගේ 40 හැවිරිදි පුත්‍රයා එළඹෙන ඉරිදා මියාමි නුවරදී යළි හමුවීමට නියමිතයි.

අමෙරිකාවට ඇතුළු වීම සඳහා අවශ්‍ය වීසා බලපත්‍රයට අදාළ ඇපකර මුදල පියවීමට නොහැකි වීම හේතුවෙන් ඇනා කැන්ඩිඩාට මීට පෙර තම පුතුගේ ක්‍රීඩාව නැරඹීමට පැමිණීමට හැකියාවක් තිබුණේ නැහැ.

තරගයකින් අනතුරුව වොසින්හා ද මාධ්‍ය වෙත ප්‍රකාශ කර තිබුණේ තම මවට තමන් ක්‍රීඩා කරන අයුරු දැකීමට වීසා ලබා ගැනීමට නොහැකි වී ඇති බවයි.

මෙම ගැටලුව පිළිබඳව අවධානය යොමු කළ ඇමරිකානු නියෝජිත මන්ත්‍රී මණ්ඩලයේ සුළුතර පක්ෂ නායක හකීම් ජෙෆ්රිස්, වොසින්හාගේ මවට රට තුළට ඇතුළු වීමට අවසර දෙන ලෙස එරට රාජ්‍ය ලේකම් මාර්කෝ රුබියෝගෙන් ඉල්ලා සිටියා.

ඇගේ සියලුම වීසා ගාස්තු නිදහස් කිරීමට පියවර ගැනුනා.

මියාමි හි පැවැත්වෙන කේප් වර්ඩ් කණ්ඩායමේ මීළඟ තරඟය සඳහා ඇයව සහභාගී කරවීමට අවශ්‍ය ප්‍රවාහන කටයුතු ද මේ වන විට සූදානම් කර ඇති බවයි විදෙස් මාධ්‍ය වාර්තා කරන්නේ.

ලෝක පාපන්දු තරගාවලියේ 'H' කාණ්ඩය යටතේ කේප් වර්ඩ් කණ්ඩායම සහභාගී වන ඔවුන්ගේ දෙවැනි තරගය එළඹෙන ඉරිදා උරුගුවේ කණ්ඩායමට එරෙහිව මියාමි හිදී පැවැත්වීමට නියමිතයි.