‘අයන් ඩෝම්’ මිසයිල ඉන්දියාවේ නිෂ්පාදනය කිරීමට සැරසෙයි

ඉන්දියාව සහ ඊශ්‍රායලය අතර ආරක්ෂක සහ යුධමය හවුල්කාරිත්වයේ නව පරිච්ඡේදයක් සනිටුහන් කරමින්, ඊශ්‍රායල රජයට අයත් ප්‍රමුඛ පෙළේ ආරක්ෂක සමාගමක් වන 'රෆායෙල් ඇඩ්වාන්ස්ඩ් ඩිෆෙන්ස් සිස්ටම්ස්' සමාගම, ඔවුන්ගේ ලොව සුපතල ‘අයන් ඩෝම්’ ගුවන් ආරක්ෂක පද්ධතියට අයත් මිසයිල ඉන්දියාව තුළ නිෂ්පාදනය කිරීමේ විශේෂ ව්‍යාපෘතියක් ආරම්භ කිරීමට සැලසුම් කරමින් සිටිනවා.

එම ආරක්ෂක පද්ධතිය සඳහා භාවිතා කරන ‘තමීර්’ (Tamir) වර්ගයේ මිසයිල ඉන්දියාව තුළ ඒකාබද්ධව නිෂ්පාදනය කිරීම සඳහා රෆායෙල් සමාගම මේ වන විටත් ඉන්දීය ආරක්ෂක සමාගම් සමග සාකච්ඡා පවත්වමින් සිටින බව NDTV පුවත් සේවය වාර්තා කර තිබෙනවා.

මූලාශ්‍ර පවසන පරිදි මෙම පියවර දෙරට අතර ඇති කරගැනීමට නියමිත ඒකාබද්ධ ආරක්ෂක ප්‍රත්‍යස්ථතා අවබෝධතාවයක කොටසක් වීමට ඉඩ තිබෙනවා.

මෙලෙස ඉන්දියාව තුළ නිෂ්පාදන පෙළක් ස්ථාපිත කිරීම මගින් වෙනත් රටවලට අලෙවි කරනු ලබන මිසයිල සඳහා වන ඉල්ලුම සපුරාලීමටත්, නිෂ්පාදන පිරිවැය අවම කරගැනීමටත්, හදිසි අවස්ථාවකදී අමතර සැපයුම් සපයා ගැනීමටත් රෆායෙල් සමාගම අපේක්ෂා කරනවා.

මෙම ගිවිසුම ක්‍රියාවට නැංවුණහොත්, එය ඉන්දීය අගමැතිවරයාගේ ‘මේක් ඉන් ඉන්ඩියා’ සංකල්පයට ඉහළ ශක්තියක් වනු ඇති අතර, කලාපය තුළ විශ්වාසදායක සහ ප්‍රමුඛතම ආරක්ෂක හවුල්කරුවෙකු ලෙස නව දිල්ලිය සතු ස්ථානය තවදුරටත් තහවුරු කරනු ඇති.

පසුගිය පෙබරවාරි මාසයේදී ජෙරුසලමේදී පැවැති හමුවේදී ඉන්දීය අග්‍රාමාත්‍ය නරේන්ද්‍ර මෝදි සහ ඊශ්‍රායල අග්‍රාමාත්‍ය බෙන්ජමින් නෙතන්යාහු විසින් ප්‍රකාශයට පත් කරන ලද 'විශේෂ උපායමාර්ගික හවුල්කාරිත්වය' (Special Strategic Partnership) වඩාත් අර්ථවත් කරමින්, දෙරටේ ආරක්ෂක සහ සුරක්ෂිතතා සබඳතා මේ වන විට ඉතා තීරණාත්මක නව අදියරක් කරා ගමන් කරමින් තිබෙනවා.