දිස්ත්‍රික්ක 07ක, කොට්ඨාස 175ක් තවමත් ඩෙංගු අධි අවදානමේ

ගම්පහ, කොළඹ, මාතර, කළුතර, මහනුවර, රත්නපුර සහ ගාල්ල දිස්ත්‍රික්කවල සෞඛ්‍ය වෛද්‍ය නිලධාරි කොට්ඨාස 175 ක් තවදුරටත් ඩෙංගු අධි අවදානම් කොට්ඨාස ලෙස හඳුනාගෙන ඇති බව ජාතික ඩෙංගු මර්දන ඒකකය පවසනවා.

වසරේ මේ දක්වා ඩෙංගු රෝගීන් 68,672 ක් සහ මරණ 47 ක් වාර්තා වී ඇති අතර, ජූලි මාසයේ ගතවූ දින 12 තුළ පමණක් වාර්තා වන ඩෙංගු රෝගීන් සංඛ්‍යාව 13,293ක්.

මේ අතර, මදුරු දෂ්ඨනයෙන් ආරක්ෂා වීම සඳහා පාසල් ළමයින්ට නිල ඇඳුමට අමතරව අත් පා ආවරණය වන පරිදි සුදුසු ඇඳුමකින් සැරසී පාසල් වෙත පැමිණීමට අවස්ථාව හිමි වීමත් සමඟ ඇතැම් පාසල් දරුවන් අද එලෙස සැරසී පාසල් වෙත පැමිණ තිබුණා.

කොළඹ අද පැවති ප්‍රවෘත්ති සාකච්ඡාවකට එක්වෙමින් කාන්තා සහ ළමා කටයුතු අමාත්‍ය සරෝජා පෝල්රාජ් පැවසුවේ මදුරු දෂ්ඨනයෙන් ආරක්ෂා වීම සඳහා පෙර පාසල් දරුවන්ද අත් සහ කකුල් ආවරණය වන සුදුසු ඇඳුමකින් පෙර පාසල් වෙත යොමු කරන ලෙසයි.