හිටපු පොලිස්පති සී.ඩීගේ මරණයට පෙර නිවසට පැමිණි පුද්ගලයින් ගැන විමර්ශන: ගිනි අවිය රස පරීක්ෂක වෙත

හිටපු පොලිස්පති සී.ඩී. වික්‍රමරත්න සියදිවි හානිකර ගැනීම සඳහා යොදාගත් බවට සැකකෙරෙන පිස්තෝලය වැඩිදුර විමර්ශන සඳහා රජයේ රස පරීක්ෂකවරයා වෙත යොමුකරන බව බස්නාහිර දකුණ දිසා අපරාධ කොට්ඨාසය භාර නියෝජ්‍ය පොලිස්පති සාමන්ත විජේසේකර ප්‍රකාශ කළා.

ඔහු කියා සිටියේ අධිකරණයට කරුණු වාර්තා කිරීමෙන් පසුව මෙම ගිනි අවිය රස පරීක්ෂකවරයා වෙත ලබන සඳුදා භාරදීමට සැලසුම් කර ඇති බවයි.

මේ අතර, මියගිය හිටපු පොලිස්පති සී.ඩී. වික්‍රමරත්නගේ අවසන් කටයුතු ලබන සඳුදා සිදුකිරීමට තීරණය වී තිබෙනවා.

මේ වනවිටත් ඔහුගේ දේහය කොළඹ පෞද්ගලික මල් ශාලාවක තැන්පත් කිරීමට අවශ්‍ය කටයුතු සිදුකරමින් පවතින බවයි වාර්තා වන්නේ.

එමෙන්ම, මෙම මරණය සිදුවීමට පෙර ඔහු හමුවීමට මාලබේ, තලාහේනේ පිහිටි ඔහුගේ නිවසට පැමිණි පුද්ගලයින් සම්බන්ධයෙන් පොලිසිය විමර්ශනයක් ආරම්භ කර තිබෙනවා.

අදාළ නිවසේ සී.සී.ටී.වී. දර්ශන ඔස්සේද ඉදිරි විමර්ශන ක්‍රියාත්මකයි.

හිටපු පොලිස්පති සී.ඩී. වික්‍රමරත්න ඊයේ වෙඩි වැදීමෙන් ජීවිතක්ෂයට පත්ව තිබුණේ මාලබේ, තලාහේනේ පිහිටි ඔහුගේ නිවසේදීයි.

පෞද්ගලික හේතුවක් මත, සිය පෞද්ගලික ආරක්ෂක නිලධාරියාගේ පිස්තෝල වර්ගයේ ගිනි අවියෙන් මොහු වෙඩි තබාගෙන සියදිවි හානි කරගන්නට ඇති බවට පොලිසිය සැක පළ කරනවා.

වෙඩි වැදීමෙන් තුවාල ලැබූ හිටපු පොලිස්පතිවරයා නැගෙනහිර කොළඹ මූලික රෝහලට ඇතුළත් කළද ඒ වන විටත් ඔහු මියගොස් සිටි අතර ඔහුගේ පපුවේ දකුණු ප්‍රදේශයට වෙඩි වැදී තිබුණා.

හිටපු පොලිස්පති සී.ඩී. වික්‍රමරත්නගේ බිරිඳගෙන් පොලිසිය මේවන විට ප්‍රකාශ සටහන් කරගෙන ඇති අතර, ඇය පවසා තිබුණේ සිය පුත්‍රයා සම්බන්ධයෙන් වූ අධිකරණ කටයුත්තක් හේතුවෙන් සිය සැමියා දැඩි කම්පනයෙන් සිටි බවටයි.

මෙම මරණය සම්බන්ධයෙන් බස්නාහිර දකුණ දිසා අපරාධ කොට්ඨාසය සහ මාලඹේ පොලිස් ස්ථානය මගින් විමර්ශන ක්‍රියාත්මකයි.