ශ්‍රී ලංකාවේ ඇළ මාර්ගයක් මත ඉදිවන පළමු සූර්ය බලශක්ති ව්‍යාපෘතිය මහියංගණය වියානා ඇළෙන්

79% ක් දක්වා පුනර්ජනනීය බලශක්තිය ප්‍රවර්ධනය කිරීමේ වැඩපිළිවෙලට සමගාමීව, ශ්‍රී ලංකාවේ පළමු 'Canal-Top Solar' (ඇළ මාර්ගයක් මත ඉදිවන සූර්ය බලශක්ති) ව්‍යාපෘතිය මහියංගණය වියානා ඇළ ආශ්‍රිතව ආරම්භ කිරීම සඳහා වන මූලික ශක්‍යතා අධ්‍යයන කටයුතු ආරම්භ කර තිබෙනවා.

කිලෝමීටර් 20කට අධික දිගකින් යුත් වියානා ඇළ ප්‍රදේශය වසර පුරා නොකඩවා හොඳින් සූර්යාලෝකය ලබන භූගෝලීය කලාපයක පිහිටා තිබීම නිසා ජාතික විදුලිබල පද්ධතියට සැලකිය යුතු බලශක්ති ධාරිතාවක් එකතු කිරීමට විශාල හැකියාවක් පවතිනවා.

අමතර භූමියක් නාස්ති නොකර සිදුකෙරෙන මෙම ව්‍යාපෘතිය මගින් ජල වාෂ්පීභවනය අවම කරගැනීමට මෙන්ම අධික උණුසුම් කාලගුණ තත්ත්වයන්හිදී ජලයේ උෂ්ණත්වය පාලනය කරගැනීමට ද හැකි වෙනවා.

මීට අමතරව, සුදුසු ආරක්ෂක සැලසුම් සහ ආරක්ෂිත විදුලි අලි වැටක් ඉදිකිරීම හරහා වන අලින් නිතර වියානා ඇළට වැටී අනතුරුවලට ලක්වීමේ පවතින දැඩි අවදානම අවම කිරීමට ද පියවර ගැනෙනවා.

එමෙන්ම අනාගතයේදී 'Green Hydrogen' (හරිත හයිඩ්‍රජන්) වැනි නව්‍ය බලශක්ති ව්‍යාපෘති සඳහා ද මෙය ඉතා යෝග්‍ය පදනමක් නිර්මාණය කරනු ඇති.

ඉන්දියාවේ ගුජරාට් ප්‍රාන්තය Canal-Top Solar සංකල්පයේ ලෝක පුරෝගාමියා වූවා සේම, මහියංගණයේ වියානා ඇළ හරහා පිරිසිදු විදුලිය නිපදවන, ජලය සංරක්ෂණය කරන සහ වන අලින් ආරක්ෂා කරන ජාතික ආදර්ශමත් ව්‍යාපෘතියක් ලෙස ශ්‍රී ලංකාවේ හරිත බලශක්ති ප්‍රතිපත්තියට නව දිශානතියක් ලබාදීමට මෙමගින් අපේක්ෂා කෙරෙනවා.