අමෙරිකාව විසින් ඉරානයේ හමුදා ඉලක්ක වෙත නව ප්‍රහාර මාලාවක් එල්ල කරයි

හෝමුස් සමුද්‍ර සන්ධිය (Strait of Hormuz) හරහා යාත්‍රා කරන වාණිජ නෞකාවලට සහ සිවිල් නාවිකයන්ට ඉරානයෙන් එල්ල වන තර්ජන මැඩපැවැත්වීමේ අරමුණින්, ඉරානයේ හමුදා ඉලක්ක වෙත නව ප්‍රහාර මාලාවක් එල්ල කළ බව අමෙරිකානු මධ්‍යම විධානය (US CENTCOM) නිවේදනය කරනවා.

මෙම හමුදා මෙහෙයුම් අතරතුරදී ඉරාන හමුදාවේ අණදෙන මධ්‍යස්ථාන, මිසයිල සහ ඩ්‍රෝන යානා දියත් කිරීමේ ස්ථාන, වෙරළාරක්ෂක පද්ධති මෙන්ම නාවික බලඇණි ඉලක්ක කර ගනිමින් නිරවද්‍ය ප්‍රහාර එල්ල කර තිබෙනවා.

ජාත්‍යන්තර මුහුදු මාර්ගවල ආරක්ෂාව තහවුරු කිරීම සහ නිදහස් නාවික ගමනාගමනය සුරක්ෂිත කිරීම සඳහා මෙම පියවර ගත් බවයි අමෙරිකාව සඳහන් කරන්නේ.

ලෝක බලශක්ති සැපයුමට අතිශයින්ම වැදගත් වන හෝමුස් සමුද්‍ර සන්ධිය ආශ්‍රිතව දෙපාර්ශ්වය අතර පවතින හමුදාමය නොසන්සුන්තාව සහ ගැටුම්කාරී තත්ත්වය ඉහළ යාමත් සමග අමෙරිකානු එක්සත් ජනපදය විසින් ඉරාන ඉලක්ක වෙත මෙලෙස අඛණ්ඩව ප්‍රහාර එල්ල කරමින් සිටින බව වාර්තා වෙනවා.