Live වීඩියෝවක් අතරතුර TikTok තරුවක් ඝාතනය කෙරේ

මෙක්සිකෝවේ ජනප්‍රිය ටික්ටොක් ක්‍රියාකරුවෙක් වන සීසර් ගැස්ටෙලම් (César Gastélum) සජීවී විකාශයක් සිදුකරමින් සිටියදී වෙඩි තබා ඝාතනය කර තිබෙනවා.

විදෙස් මාධ්‍ය වාර්තා කළේ, මෙක්සිකෝවේ වයඹ දිග පිහිටි සිනාලෝවා ප්‍රාන්තයේ කුලියාකාන් (Culiacán) නගරයේ අවන්හලක් ඉදිරිපිටදී මෙම වෙඩි තැබීම සිදුව ඇති බවයි.

ටික්ටොක් ගිණුම හරහා අනුගාමිකයින් 600,000කට අධික පිරිසක් සිටි ගැස්ටෙලම්, සජීවී විකාශය අතරතුර යතුරුපැදියකින් පැමිණි හිස්වැසුම් පැළඳ සිටි පුද්ගලයින් දෙදෙනෙකු විසින් වෙඩි තබා ඇති බවයි වාර්තා සඳහන් කරන්නේ.

සිනාලෝවා ප්‍රාන්ත ආරක්ෂක නිලධාරියෙකු ඔහුගේ මරණය තහවුරු කර ඇති අතර, සිද්ධිය සම්බන්ධයෙන් විශේෂ ආරක්ෂක මෙහෙයුමක් ආරම්භ කර ඇති බව සඳහන් කර තිබෙනවා.

මෙක්සිකෝ ෆෙඩරල් ආරක්ෂක කැබිනට් මණ්ඩලය සඳහන් කර ඇත්තේ, මෙම ප්‍රහාරය සමාජ මාධ්‍ය ඔස්සේ ගැස්ටෙලම් විසින් පළ කළ ඇතැම් සටහන් සමග සම්බන්ධයක් තිබේද යන්න පිළිබඳව පරීක්ෂණ සිදුකරන බවයි.

එහිදී ඔහු අපරාධ කණ්ඩායමක් පිළිබඳව සඳහන් කර ඇති බවට සැක පළ වී තිබෙනවා.

මෙක්සිකෝ ජනාධිපතිනි ක්ලෝඩියා ශයින්බෝම් (Claudia Sheinbaum) ප්‍රකාශ කර ඇත්තේ, මෙම ඝාතනයට වගකිව යුතු පුද්ගලයින් සහ එය මෙහෙයවූ පුද්ගලයින් අත්අඩංගුවට ගත යුතු බවයි.