22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත පාර්ලිමේන්තු න්‍යායපත්‍රයට ඇතුළත් කෙරේ

22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත පාර්ලිමේන්තු න්‍යායපත්‍රයට ඇතුළත් කිරීමට පියවර ගෙන තිබෙනවා.

ශ්‍රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්‍රාම වයස ඉහළ නැංවීම සඳහා වන 22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත හෙට (18 ) පාර්ලිමේන්තුවට ඉදිරිපත් කිරීමට නියමිත අතර මෙම යෝජිත සංශෝධනය යටතේ ශ්‍රේෂ්ඨාධිකරණ විනිසුරුවරුන්ගේ විශ්‍රාම වයස අවුරුදු 65 සිට 67 දක්වාද, අභියාචනාධිකරණ විනිසුරුවරුන්ගේ විශ්‍රාම වයස අවුරුදු 63 සිට 65 දක්වාද දීර්ඝ කිරීමට අපේක්ෂා කෙරෙනවා.

අධිකරණ පද්ධතියේ පවතින නඩු ප්‍රමාදයන් අවම කරලීම සහ ජ්‍යෙෂ්ඨ විනිසුරුවරුන්ගේ සේවය අඛණ්ඩව ලබා ගැනීම මෙහි අරමුණ බවයි රජය පෙන්වා දෙන්නේ.

කෙසේ වෙතත්, මෙම සංශෝධනය හරහා අධිකරණයේ ස්වාධීනත්වයට බලපෑම් එල්ල විය හැකි බවට නීතිඥ සංගමය ඇතුළු විවිධ පාර්ශ්වයන්ගෙන් දැඩි විරෝධතා මතුව ඇති පසුබිමක් තුළ, මෙම පනත් කෙටුම්පත පාර්ලිමේන්තුවට ඉදිරිපත් කිරීම දේශපාලන හා නීති ක්ෂේත්‍රයේ දැඩි කතාබහට ලක්ව තිබෙනවා.