ගෝලයෝ- දමයන්ති ෆොන්සේකාට "පරණ පිනක්" පාදයි

"රංගනය ඉගෙන ගන්න කැමති දරුවෝ පිරිසක් 2013 දී මගේ නාට්‍ය පාසැල ට අඩිතාලම දැම්මේ. පළමු කාණ්ඩයේ දරුවන්ගේ වැඩමුළුව අවසන් වුණා. ඔවුන් ආරාධනා කළා වේදිකා නාට්‍යකට. මොකද ඉස්සරෝම වැඩමුළුව හින්දා මතක හිටින්නත් ඕනිනේ. 'ගාස්තුව කීයද' බිහිවුනේ එහෙමයි. ඒ මගේ නාට්‍ය පාසලේ මංගල වේදිකා නාට්‍ය... එතකොට 'පරණ පිනක්' පාත් වුනේ (සිනහ වෙමින්) මගේ දෙවෙනි දරු පරපුරේ හැකියාවෙන්...."

ප්‍රවීණ රංගන ශිල්පිනී  දමයන්ති ෆොන්සේකා අප සමග කතාවට මුල පිරුවේ එහෙමයි.

කලා ශිල්පිනියක් වීමත් පිනක් ..
ආදරය දිනා ගැනීමත් පිනක් ..
දමයන්ති ෆොන්සේකාගෙන්   "පරණ පිනක්"

 





 




රංගන අත්දැකීම් ලබාදීම  ඔස්සේ  නවක ශිල්පීන්ට අභ්‍යාස තුළින් ඒවා ක්‍රියාත්මක කල හැකි බව  දමයන්ති ෆොන්සේකාගේ ස්ථාවරයයි.
කෙසේ වෙතත් 1948 නිදහස ලැබීමෙන් පසු බොහෝ  පාලකයන් මෙරට නාට්‍ය කලාවේ ප්‍රගමනය  උදෙසා කටයුතු නොකළ බව ඇය පවසන්නේ සංවේගයෙන්.

නාට්‍ය ශිල්පීන්ට වර්තමානයේ පුහුණු වීම් කටයුතු සඳහාවත් නිසි ස්ථාන නොමැති බැව් ඇය පවසයි.

මේ අතර නෙලුම් පොකුණ රඟහල නිර්මාණය කර ඇත්තේ නාට්‍ය සඳහා සුදුසු  ලෙස නොවන  බවයි ඇය පෙන්වා දෙන්නේ. එසේම නාට්‍ය කරුවෙකුට නෙලුම් පොකුණ රඟහලේ ගාස්තු දැරිය නොහැකි බව ද  දමයන්ති ෆොන්සේකා සඳහන් කළේ 'අපේ රටේ නාට්‍යකරුවන්ට කාගේ පිහිට දැයි' ප්‍රශ්න කරමින්.
 
එවැනි තත්වයක් යටතේ වුව ද කලාව වෙනුවෙන් කැපවන බව ඇය සිහිපත්  කළා.

දමයන්ති ෆොන්සේකා, සිනමා සහ ටෙලි නාට්‍ය අධ්‍යක්ෂණය අපේක්ෂාවෙන් මේ දිනවල කටයුතු කරන බවද අපට දැනගන්නනට ලැබුනා.

1975 පමණ සිට දේශීය හා විදේශීය රංගන අභ්‍යාස වැඩමුළු ද පවත්වා ජාත්‍යන්තරයේ ද කීර්තිමත් නාමයක් හිමිකරගත් දමයන්ති ෆොන්සේකාගේ නාට්‍ය පාසලේ දෙවන කණ්ඩායම නිර්මාණය කළ 'පරණ පිනක්' වේදිකා නාට්‍ය  ලබන සෙනසුරාද (20) ප්‍රදර්ශනය කෙරෙනවා. ඒ මරදාන ටවර් රඟහලේ දී. පස්වරු 3 සහ රාත්‍රී 7 ලෙස දර්ශන දෙකක් ඊට ඇතුළත්. දරුවන්ගේ හැකියාවන් අගය කරන ප්‍රවීන ශිල්පීන් කිහිප දෙනෙක් ද  'පරණ පිනක්'  වෙනුවෙන් දායක වන බව දමයන්ති ෆොන්සේකා සඳහන් කළේ කෘතඥ පුර්වකවයි.