பெண் காவல்துறை கான்ஸ்டபிள்கள் ஆட்சேர்ப்பில் கடுமையான அநீதி: அரசாங்கத்திடம் சஜித் பிரேமதாச கேள்வி!

இலங்கை காவல்துறை சேவையில் பெண் காவல்துறை கான்ஸ்டபிள் பதவிக்கான ஆட்சேர்ப்பின் போது, தகுதிபெற்ற பெண் விண்ணப்பதாரர்களுக்கு கடுமையான அநீதி இழைக்கப்பட்டுள்ளதாக எதிர்க்கட்சித் தலைவர் சஜித் பிரேமதாச தெரிவித்துள்ளார்.

பாதிக்கப்பட்ட பெண் விண்ணப்பதாரர்களுடன் இன்று எதிர்க்கட்சித் தலைவர் அலுவலகத்தில் இடம்பெற்ற சந்திப்பின் போதே அவர் இந்த விபரங்களை வெளியிட்டார்.

கடந்த 2021 ஆம் ஆண்டு ஆரம்பிக்கப்பட்ட இந்த ஆட்சேர்ப்பு செயல்முறையின் போது, ஆரம்ப மற்றும் எழுத்துப் பரீட்சைகளில் சித்தியடைந்து, கைரேகை உள்ளிட்ட அனைத்துப் பரீட்சைகளிலும் சித்தியடைந்த பெண் விண்ணப்பதாரர்களின் மருத்துவப் பரிசோதனைகள் திட்டமிட்டபடி நடத்தப்படாமல் பிற்போடப்பட்டன.

இதன் காரணமாக, இன்றுவரை அவர்களுக்கு நியமனங்களை வழங்க அதிகாரிகள் தவறியுள்ளனர்.

தற்போது இந்த 2021 ஆம் ஆண்டு வர்த்தமானியை இரத்து செய்துவிட்டு, 2026 ஆம் ஆண்டின் புதிய வர்த்தமானியின் ஊடாக வயது எல்லையை மாற்றி, கல்வித் தகைமைகளை அதிகரித்து, புதிய பெண் காவல்துறை கான்ஸ்டபிள்களை நியமிக்க அரசாங்கம் தயாராகி வருகின்றது.

இதனால் ஐந்து வருடங்களுக்கும் மேலாக நியமனங்கள் இன்றி தவிக்கும் இந்த தகுதிவாய்ந்த பெண்களுக்கு அரசாங்கம் வழங்கும் பதில் என்ன என்பதை அறிய வேண்டியுள்ளதாக எதிர்க்கட்சித் தலைவர் கேள்வி எழுப்பினார்.

2160 மற்றும் 2163 ஆகிய வர்த்தமானி அறிவித்தல்களில் உள்ள பெண் விண்ணப்பதாரர்களை இந்தப் புதிய வர்த்தமானி அறிவித்தலின் கீழ் உள்வாங்குவதற்கும், 2021 ஆம் ஆண்டின் 2215 ஆம் இலக்க வர்த்தமானி அறிவித்தலின் கீழ் விண்ணப்பித்த பெண் விண்ணப்பதாரர்களை இந்த ஆட்சேர்ப்பு செயல்முறையிலிருந்து நீக்கிவிட்டு, இருவேறு விதமாகச் செயற்படுவதானது மனித மற்றும் அடிப்படை உரிமைகளை மீறும் செயலாகும் என்று அவர் சுட்டிக்காட்டினார்.