வட்ஸ்அப்பில் நேரடியாகக் கட்டணம் செலுத்தும் வசதியை அறிமுகப்படுத்தியது இந்தியா!

இதன் மூலம் பயனர்கள் வேறு செயலிகளுக்குச் செல்லாமல், வாட்ஸ்அப் செயலிக்குள் இருந்தே அன்றாட பயன்பாட்டுக்கான பல்வேறு கட்டணங்களை செலுத்த முடியும்.

இந்த புதிய சேவை இந்தியாவின் ‘பாரத் கனெக்ட்’ (Bharat Connect/BBPS) வலையமைப்புடன் இணைக்கப்பட்டுள்ளது.

இதன் ஊடாக மின்சாரம், நீர், எரிவாயு, FASTag, காப்பீடு, கடன் அட்டை மற்றும் கடன் தவணை உள்ளிட்ட 30 வகையான சேவைகளுக்கான 22,700 க்கும் அதிகமான கட்டண வழங்குநர்களிடம் பணம் செலுத்தும் வசதி வழங்கப்பட்டுள்ளது.

இந்த வசதியைப் பயன்படுத்த, வாட்ஸ்அப் செயலியின் முகப்புப் பக்கத்தில் உள்ள கட்டணம் செலுத்தும் பிரிவை அணுக முடியும். அங்கு ஏற்கனவே பயன்படுத்திய கட்டண விவரங்களைச் சேமித்துக்கொள்ளவும், ஒரே சேவை வழங்குநரின் கீழ் வீடு, அலுவலகம் மற்றும் குடும்ப உறுப்பினர்களுக்கான பல்வேறு கணக்குகளை நிர்வகிக்கவும் முடியும்.

மேலும், UPI, பற்று அட்டை (Debit card) மற்றும் (credit card) அட்டை உள்ளிட்ட பல்வேறு முறைகளில் பணம் செலுத்தும் வசதியும் வழங்கப்பட்டுள்ளது.

இதுகுறித்து மெட்டா இந்தியாவின் நிர்வாக இயக்குநரும் இந்தியப் பிரிவு தலைவருமான அருண் ஸ்ரீனிவாஸ் தெரிவிக்கையில், குறுஞ்செய்தி அனுப்புவது போன்று எளிதாக அன்றாட கட்டண செலுத்தும் வசதியை இந்திய மக்களுக்கு வழங்குவதே இதன் நோக்கம் எனக் குறிப்பிட்டுள்ளார்.

இந்த புதிய வசதி எதிர்வரும் சில வாரங்களில் Android மற்றும் iOS பயன்படுத்தும் பயனர்களுக்கு படிப்படியாக விரிவுபடுத்தப்படவுள்ளதாக தெரிவிக்கப்பட்டுள்ளது.