5 பேர் கொண்ட குடும்பமா? பின்புற இருக்கையில் கூடுதல் இருக்கைப்பட்டி பொருத்த யோசனை!

நாடாளுமன்றத்தில் இன்று கருத்து தெரிவித்த அமைச்சர், வாகனங்களில் தேவையான ஒவ்வொரு இருக்கைக்கும் இருக்கைப்பட்டி பொருத்தப்பட்டிருப்பதே முக்கியம் எனக் குறிப்பிட்டார்.

வாகனத்தில் பயணிக்கக்கூடியவர்களின் எண்ணிக்கையை மூன்று அல்லது நான்கு பேர் என மட்டுப்படுத்துவதற்கு தங்களுக்கு அதிகாரம் இல்லை என்றும், பயணிக்கும் ஒவ்வொருவரும் இருக்கைப்பட்டியை அணிவதை உறுதி செய்வதே இந்தச் சட்டத்தின் நோக்கம் என்றும் அவர் தெரிவித்தார்.

ஏற்கனவே இருக்கைப்பட்டிகள் பொருத்தப்பட்டுள்ள வாகனங்களில், பயணிகள் அவற்றை கட்டாயம் பயன்படுத்த வேண்டும் எனவும் அமைச்சர் கூறினார்.

அதேவேளை, இருக்கைப்பட்டி வசதி இல்லாத வாகனங்களில் அவற்றைப் பொருத்துவதற்காக ஒரு வருட கால அவகாசம் வழங்கப்பட்டுள்ளதாகவும் அவர் குறிப்பிட்டார். இந்தச் சட்டம் கடந்த செப்டம்பர் 19ஆம் திகதி முதல் கட்டாயமாக்கப்பட்டுள்ளது.

மேலும், அண்மையில் நெடுஞ்சாலையில் பாடசாலை மாணவர்கள் பயணித்த பேருந்து உட்பட 11 வாகனங்கள் விபத்துக்குள்ளான சம்பவத்தைச் சுட்டிக்காட்டிய அமைச்சர், பேருந்தில் பயணித்த அனைவரும் இருக்கைப்பட்டி அணிந்திருந்ததால், விபத்தினால் ஏற்பட்ட பாதிப்புகள் சிறிய காயங்களுடன் மட்டுப்படுத்தப்பட்டதாகத் தெரிவித்தார்.

இருக்கைப்பட்டி சட்டத்தின் நோக்கம் பயணிகளின் எண்ணிக்கையைக் கட்டுப்படுத்துவது அல்ல என்றும், வாகனங்களில் பயணிக்கும் அனைவரின் பாதுகாப்பை உறுதி செய்வதே இதன் பிரதான நோக்கம் என்றும் அமைச்சர் பிமல் ரத்நாயக்க வலியுறுத்தினார்.

மூன்று குழந்தைகள் மற்றும் இரண்டு பெற்றோர்கள் என ஐந்து பேர் கொண்ட குடும்பம் பயணிக்கும்போது, பின்புற இருக்கையின் நடுப்பகுதியில் ஒரு குழந்தைக்காக மேலதிக இருக்கைப்பட்டியைப் பொருத்திக்கொள்ள முடியும் என்றும் அவர் மேலும் தெரிவித்தார்.