நீண்ட நாள் கனவு நனவானது - சூப்பர் ஸ்டாருடன் மீண்டும் இணைவது குறித்து சிம்ரன் நெகிழ்ச்சி!

சூப்பர் ஸ்டார் ரஜினிகாந்த் நடிக்கும் அவரது 173ஆவது திரைப்படமான 'தர்மன்' படத்தின் படப்பிடிப்பில் கலந்துகொள்வதற்காக நடிகை சிம்ரன் தீவிரமாகத் தயாராகி வருகிறார்.

கடந்த 2019ஆம் ஆண்டு வெளியான 'பேட்ட' திரைப்படத்திற்குப் பிறகு, இவர்கள் இருவரும் மீண்டும் இணைவது ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது.

சமீபத்தில் நடைபெற்ற 'தர்மன்' திரைப்படத்தின் பூஜை மற்றும் தொடக்க விழாவில் கலந்துகொண்ட சிம்ரன் தனது மகிழ்ச்சியைப் பகிர்ந்துள்ளார்.

"பேட்ட படத்திற்குப் பிறகு ரஜினி சாரைச் சந்தித்தபோது, அவருடன் மேலும் பல படங்களில் நடிக்க வேண்டும் என்ற எனது விருப்பத்தைக் கூறினேன். இந்த வாய்ப்பிற்காக நீண்ட நாட்களாகக் காத்திருந்தேன், தற்போது அது நனவாகியுள்ளது" என்று அவர் குறிப்பிட்டுள்ளார்.

மேலும், ரஜினிகாந்துடன் தனது திரைப்பயணத்தின் மற்றுமொரு அழகான அத்தியாயத்தைத் தொடங்குவதில் பெருமிதம் கொள்வதாகவும் அவர் தனது சமூக வலைதளப் பக்கத்தில் பதிவிட்டுள்ளார்.

கமல்ஹாசனின் 'ராஜ் கமல் ஃபிலிம்ஸ் இன்டர்நேஷனல்' நிறுவனம் தயாரிக்கும் இந்த திரைப்படத்தை, 'ஓ மை கடவுளே' திரைப்பட புகழ் அஸ்வத் மாரிமுத்து இயக்குகிறார்.

மூன்று இயக்குநர்கள் மாற்றத்திற்குப் பிறகு அஸ்வத் மாரிமுத்துவின் கைகளுக்கு இந்த திரைப்படம் வந்துள்ளது என்பது குறிப்பிடத்தக்கது.

அனிருத் இசையமைக்கும் இந்த திரைப்படத்தின் First look poster சமீபத்தில் வெளியாகி சமூக வலைதளங்களில் வைரலாகி வருகிறது.