இன்ஸ்டா பதிவின் பின்னணியில் 2 ஆண்டுகால வலி: நிவின் பாலி கூறியதை மீண்டும் பகிர்ந்த அனுபமா

இந்தப் பதிவு அவரது தனிப்பட்ட உறவு தொடர்பானதாக இருக்கலாம் என சமூக வலைதளங்களில் பல்வேறு கருத்துகள் பகிரப்பட்டன.

இதனிடையே, அண்மையில் அவர் அளித்த நேர்காணல் ஒன்றில், தனது முந்தைய உறவு குறித்து பெயரைக் குறிப்பிடாமல் அனுபமா பரமேஸ்வரன் மனம் திறந்து பேசியிருந்தார்.

தனது பழைய உறவில் சுமார் இரண்டு ஆண்டுகள் மன ரீதியான துன்பங்களை எதிர்கொண்டதாகவும், அந்தக் காலகட்டத்தில் உடல் மற்றும் மன ரீதியாக பாதிக்கப்பட்டு, தனது உடல் எடை கணிசமாகக் குறைந்ததாகவும் அவர் தெரிவித்திருந்தார்.

மேலும், தனது இன்ஸ்டாகிராம் பதிவுக்குப் பின்னால் இரண்டு ஆண்டுகால வலி மற்றும் உணர்வுப்பூர்வமான போராட்டங்கள் இருந்ததாகவும், முழுமையாகக் குணமடைந்த பின்னரே அது குறித்து பேச விரும்பியதாகவும் கூறியிருந்தார்.

இந்த நேர்காணல் சமூக வலைதளங்களில் கவனம் பெற்ற நிலையில், நடிகர் நிவின் பாலி பெண்கள் குறித்து பேசிய பழைய காணொளி ஒன்றை அனுபமா தற்போது தனது இன்ஸ்டாகிராம் பக்கத்தில் பகிர்ந்துள்ளார்.

அதனுடன், “நிவின் பாலி 12 ஆண்டுகளுக்கு முன்பே இதை என்னிடம் கூறினார்” என அவர் குறிப்பிட்டுள்ளார்.

அந்தக் காணொளியில் பேசிய நிவின் பாலி, பெண்கள் வீட்டிலும், கல்வி நிறுவனங்களிலும், விடுதிகளிலும் பல்வேறு கட்டுப்பாடுகளை எதிர்கொள்வதாகக் குறிப்பிட்டுள்ளார்.

மேலும், பெண்கள் தங்களது ஆசைகள் மற்றும் கனவுகளை நோக்கி தைரியமாக முன்னேற வேண்டும் என்றும், தங்களது வாழ்க்கையை மகிழ்ச்சியாக வாழ வேண்டும் என்றும் அவர் வலியுறுத்தியுள்ளார்.

அனுபமா பரமேஸ்வரன், 2015ஆம் ஆண்டு வெளியான ‘பிரேமம்’ திரைப்படம் மூலம் திரையுலகில் அறிமுகமானார். இந்தத் திரைப்படத்தில் அவர் நிவின் பாலியுடன் இணைந்து நடித்திருந்தார் என்பது குறிப்பிடத்தக்கது.