ඊශ්‍රායල ප්‍රහාර හමුවේ බීරූට් රෝහල් තුවාලකරුවන්ගෙන් පිරී යයි

ලෙබනනයේ අගනුවරට බෝම්බ වර්ෂාවක් එල්ල වෙද්දී, සිය ගණනක් ජනයා බීරූට්හි අමෙරිකානු විශ්වවිද්‍යාල රෝහල (AUB) වෙත ඇදී එන්නට වුණා.

සිය දෙමාපියන්, සහෝදර සහෝදරියන් ජීවතුන් අතර සිටිනවාද යන්න පවා නොදැන දරුවන් ඔවුන්ව සොයමින් සිටිනු දක්නට ලැබුණු බවයි විදෙස් මාධ්‍ය සඳහන් කරන්නේ.

අමෙරිකාව සහ ඉරානය අතර ඇති කරගත් සටන් විරාම ගිවිසුමට ලෙබනනය ද ඇතුළත් වනු ඇතැයි බොහෝ දෙනා බලාපොරොත්තු තබා සිටියද, ඊශ්‍රායල හමුදා පසුගිය බදාදා මිනිත්තු 10ක් ඇතුළත රට පුරා ඉලක්ක 100කට අධික සංඛ්‍යාවකට බෝම්බ ප්‍රහාර එල්ල කළා.

"පැයකට අඩු කාලයකදී අපට තුවාල ලැබූවන් 76 දෙනෙකු පමණ ලැබුණා. අවාසනාවකට ඉන් හය දෙනෙකු බේරා ගැනීමට අපට හැකි වුණේ නැහැ," යැයි එම රෝහලේ ප්‍රධාන වෛද්‍ය නිලධාරී වෛද්‍ය සලා සයිනෙල්ඩින් අල් ජසීරා පුවත් සේවයට පවසා තිබෙනවා.

ලෙබනන් සෞඛ්‍ය අමාත්‍යාංශය නිකුත් කළ මූලික වාර්තාවලට අනුව, බදාදා එල්ල වූ ප්‍රහාරවලින් මියගිය සංඛ්‍යාව 303 දක්වා ඉහළ ගොස් ඇති අතර, තුවාල ලැබූ සංඛ්‍යාව 1,150ක්.

වෛද්‍ය සයිනෙල්ඩින් සඳහන් කළේ, රෝහලට රැගෙන ආ බරපතල තුවාල ලැබූවන් අතර වැඩි පිරිසක් දරුවන් බවයි.

වැඩිමහල් දරුවා අවුරුදු 12ක් වූ අතර, දැඩි සත්කාර ඒකකයට ඇතුළත් කිරීමට සිදු වූ අනෙක් රෝගීන් දෙදෙනා මාස කිහිපයක් සහ සති කිහිපයක් වයසැති බිළිඳුන්.

ලෙබනන් සෞඛ්‍ය අමාත්‍යාංශයට අනුව මියගිය පිරිස අතර අවම වශයෙන් කාන්තාවන්, ළමුන් සහ වැඩිහිටියන් 110 දෙනෙකු සිටිනවා.

පිපිරුම් හේතුවෙන් ගොඩනැගිලි කඩා වැටීමෙන් ඒවාට යටවීම නිසා සිදු වූ අස්ථි බිඳීම් සහ හිසට සිදු වූ බරපතල තුවාල මරණවලට ප්‍රධාන හේතු වී ඇති බවට සඳහන්.