ගල් අඟුරු කොමිසමේ සාක්ෂි විමසීම ජූලි මුල් සතියේ ඇරඹේ

ගල් අඟුරු ආනයනයේදී සහ ඒ ආශ්‍රිත ප්‍රසම්පාදන ක්‍රියාවලීන්හිදිී සිදුවී ඇතැයි කියන අක්‍රමිකතා සම්බන්ධයෙන් සොයාබැලීමට පත් කළ ජනාධිපති කොමිසම සිය සාක්ෂි විමසීම ජූලි මස පළමු සතියේදී ආරම්භ කිරීමට නියමිතයි.

ගල් අඟු‍රු මත පදනම් වූ විදුලිබල උත්පාදනය ආරම්භයේ සිට 2026 අප්‍රේල් 16 දක්වා ගල් අඟු‍රු ආනයනය සහ විදුලිබල උත්පාදනය සම්බන්ධයෙන් සිදු වූ බව කියන අක්‍රමිකතා විමර්ශනය කිරීම සඳහා ජනාධිපතිවරයා විසින් පසුගිය අප්‍රේල් 17 වනදා මෙම කොමිසම පත්කරනු ලැබුවා.

ඒ අනුව, මේ වන විට අදාළ කොමිසම වෙත පැමිණිලි 28 ක් ඉදිරිපත්ව ඇති අතර, කොමිසම විසින් ප්‍රසම්පාදන කමිටු සාමාජිකයින් සහ ගල් අඟු‍රු ආශ්‍රිත ගනුදෙනුවලට සම්බන්ධ ආයතනවලට අනුයුක්ත අනෙකුත් පුද්ගලයින් ඇතුළුව රජයේ නිලධාරීන් 40 දෙනෙකුගෙන් පමණ ප්‍රකාශ සටහන් කරගෙන තිබෙනවා.

මේ අතර, ගල් අඟුරු ආනයනය කිරීම සඳහා මෙම වර්ෂයේ අප්‍රේල් මාසයේදී ඇමරිකානු ඩොලර් මිලියන 43.4 ක් වැයවී ඇති බව ශ්‍රී ලංකා මහ බැංකුව පවසනවා.

එහෙත් පසුගිය 2025 වසරේ අප්‍රේල් මාසයේදී ගල් අඟුරු ආනයනය සඳහා වැයවී ඇත්තේ ඩොලර් මිලියන 24.9 ක් පමණයි.

ඒ අනුව පෙර වසරට සාපේක්ෂව අප්‍රේල් මාසයේ ගල් අඟුරු ආනයනයේ වියදම 74.2% කින් ඉහළ ගොස් ඇති බවයි මහ බැංකුව නිකුත් කළ වාර්තාවක දැක්වෙන්නේ.