අතුරුදන් වූ K2 ගුවන් යානයේ සුන්බුන් හමුවේ: කාර්ය මණ්ඩලය සෙවීමේ මෙහෙයුම් තවදුරටත්

කරච්චි වෙරළට ඔබ්බෙන් අත්රුදන් වූ භාණ්ඩ ප්‍රවාහන ගුවන් යානයේ සුන්බුන් පැය 12කට පසුව සොයා ගැනීමට පාකිස්තාන මුදවා ගැනීමේ කණ්ඩායම් සමත්ව තිබෙනවා.

ගැඹුරු මුහුදේ සිදු කළ සෙවුම් මෙහෙයුමකදීයි ඔවුන් මෙම සුන්බුන් සොයාගෙන ඇත්තේ.

එහි සිටි කාර්ය මණ්ඩල සාමාජිකයින් පස්දෙනා සෙවීමේ කටයුතු තවදුරටත් ක්‍රියාත්මක වන බව බලධාරීන් ප්‍රකාශ කර ඇති බවයි විදෙස් මාධ්‍ය සඳහන් කරන්නේ.

K2 එයාර්වේස් සමාගමට අයත් මෙම බෝයිං 737 (Boeing 737) වර්ගයේ ගුවන් යානයේ සුන්බුන්, ඔර්මාරා (Ormara) වරායට දකුණින් නාවික සැතපුම් 53ක් (කිලෝමීටර් 98ක්) දුරින් තිබී සොයාගත් බව පාකිස්තාන ගුවන් තොටුපළ බලධාරීන් පවසා තිබෙනවා.

යානයේ සුන්බුන් පවතින ස්ථානය හඳුනා ගැනීම සඳහා පාකිස්තාන නාවික හමුදාව සහ පාකිස්තාන සමුද්‍රීය ආරක්ෂක ඒජන්සිය විසින් ගුවන් සහ මුහුදු යාත්‍රා රැසක් යොදවා තිබූ බවත්, අතුරුදන් වූ කාර්ය මණ්ඩල සාමාජිකයින් සෙවීමේ මෙහෙයුම් තවදුරටත් සිදුවන බවත්, සඳහන්.

දිශානති පද්ධතියේ (Navigational System) ඇති වූ දෝෂයක් වාර්තා කිරීමෙන් පසු අරාබි මුහුදේදී අතුරුදන් වූ, මෙම භාණ්ඩ ප්‍රවාහන යානය සෙවීමේ කටයුතු කඩිනම් කරන ලෙස අග්‍රාමාත්‍ය ෂෙහ්බාස් ෂරීෆ් බලධාරීන්ට උපදෙස් දී ඇති බවයි රොයිටර් පුවත් සේවය සඳහන් කරන්නේ.

යානය මෙහෙයවූ K2 Airways සමාගම ප්‍රකාශ කර ඇත්තේ, එහි කාර්ය මණ්ඩලයට නියමුවන් දෙදෙනෙකු, ඉංජිනේරුවන් දෙදෙනෙකු සහ එක් සහායක සේවකයෙකු ඇතුළත් වූ බවයි.

ඔවුන්ගේ තත්ත්වය පිළිබඳව බලධාරීන් මෙතෙක් නිල ප්‍රකාශයක් කර නොමැති වුවද, අග්‍රාමාත්‍ය ෂරීෆ් ඔවුන්ගේ පවුල් වෙත සිය හෘදයාංගම ශෝකය ප්‍රකාශ කර තිබෙන බවයි විදෙස් මාධ්‍ය සඳහන් කරන්නේ.