'' චාමර සම්පත්ගේ පළතුරු වට්ටි කතාව බොරු" - සිරිල් ගාමිණී පියතුමන්

පාර්ලිමේන්තු මන්ත්‍රී චාමර සම්පත් දසනායක විසින් පසුගියදා කරන ලද ප්‍රකාශයක් සම්බන්ධයෙන් අතිඋතුම් කාදිනල් හිමිපාණන්ගේ මාධ්‍ය ප්‍රකාශක, ගරු සිරිල් ගාමිණී ප්‍රනාන්දු පියතුමා විසින් විශේෂ නිවේදනයක් නිකුත් කර තිබෙනවා.

එම නිවේදනයට අනුව, චාමර සම්පත් මන්ත්‍රීවරයා ප්‍රකාශ කර ඇත්තේ වත්මන් හමුදාපතිතුමා ජූලි මස 02 වැනිදා පලතුරු වට්ටියක් රැගෙන කාදිනල් හිමිපාණන් බැහැදැකීමට ගිය බවත්, එදිනම ඔහුගේ සේවා කාලය දීර්ඝ කරන ලද බවත් ය.

ගරු සිරිල් ගාමිණී ප්‍රනාන්දු පියතුමා සිය නිවේදනය මගින් අවධාරණය කරන්නේ මෙම ප්‍රකාශය සම්පූර්ණයෙන්ම අසත්‍ය සහ පදනම් විරහිත එකක් බවයි.

නිවේදනයේ සඳහන් වන පරිදි, අතිඋතුම් කාදිනල් හිමිපාණන් රෝමයේ වතිකානය බලා ගොස් යළි දිවයිනට පැමිණ ඇත්තේ ජූලි මස 03 වැනිදායි

එබැවින් මන්ත්‍රීවරයා පවසන පරිදි ජූලි 02 වනදා යුද හමුදාපතිතුමා සහ කාදිනල් හිමිපාණන් අතර කිසිදු හමුවීමක් සිදුවිය නොහැකි බවත්, එවැනි හමුවීමක් කිසිසේත්ම සිදු නොවූ බවත් පියතුමා පැහැදිලි කරනවා.

මෙම ප්‍රකාශය සම්පූර්ණයෙන්ම අසත්‍ය ප්‍රකාශයක් බව අවධාරණය කරන අතර, එය සම්පූර්ණයෙන්ම ප්‍රතික්ෂේප කරමු. ඔහුගේ මෙම ප්‍රකාශය තුළ ඇත්තේ ආගම්වාදය පදනම් කරගෙන මේ රටේ ආගමික සංහිඳියාව විනාශ කිරීම මගින් පටු දේශපාලන වාසි ලබා ගැනීමේ නින්දිත අරමුණක් බව පැහැදිලිය." යනුවෙන් එම දැනුම්දීමේ සඳහන්.

මෙම වෛරී ප්‍රකාශය සම්බන්ධයෙන් චාමර සම්පත් මන්ත්‍රීවරයාට එරෙහිව නීතිමය මාර්ගයෙන් කටයුතු කිරීම පිළිබඳව අතිඋතුම් කාදිනල් හිමිපාණන්ගේ නීතිඥයින් මේ වන විටත් කටයුතු කරමින් සිටින බවද එම නිවේදනයේ වැඩිදුරටත් සඳහන් වෙන්නේ.