වෘත්තීය පුහුණුවට ආ බාලවයස්කරුවාට අපරාධයක් කළ 72 හැවිරිදි ගුරුවරයාට වසර 07ක බරපතල වැඩ සහිත සිරදඩුවම්

තමා යටතේ වෘත්තිය පුහුණුවක් ලබමින් සිටි දාසය හැවිරිදි සිසුවකු හට බරපතල ලිංගික අපයෝජනයක් සිදු කිරීමේ චෝදනාවට වරදකරු වූ ගුරුවරයකුට බරපතල වැඩ සහිත වසර 07ක සිර දඬුවමක් ගම්පහ මහාධිකරණ විනිසුරු කනිෂ්ක විජේරත්න අද (30) නියම කළා.

එම චෝදනාවට රුපියල් 15000 දඩ මුදලක් ද, අගතියට පත් පාර්ශවයට රුපියල් ලක්ෂ 02ක වන්දි මුදලක්ද ගෙවන ලෙසට විනිසුරුවරයා චූදිතට නියම කළා.

එම වන්දි මුදල නොගෙවන්නේ නම් බරපතල වැඩ සහිත වසර දෙකක අමතර සිර දඬුවමක්ද, අදාල දඩ මුදල නොගෙවන්නේ නම් තවත් අමතර මාස හයක සිර දඬුවමක් ද අධිකරණයෙන් චුදිතට නියම කෙරුණා.

සපුගස්කන්ද පොලිස් බල ප්‍රදේශයේ සහතික කළ පාසලක ආරක්ෂාව යටතේ වෘත්තිය පුහුණුව ලබාමින් සිටි දාසය 16 හැවිරිදි සිසුවකුට බරපතළ ලිංගික අපයෝජනයක් සිදුකිරීමේ චෝදනාව සම්බන්ධයෙන් ඉදිරිපත් වූ සාක්කි හා වෛද්‍ය වාර්තා මගින් පැමිණිල්ල විසින් සාධාරණ සැකයකින් තොරව චෝදනා ඔප්පු කර ඇති බව ප්‍රකාශ කරමින් විනිසුරුවරයා මෙම නියෝගය කර සිටියා.

මෙලෙස දඬුවම් නියම වූයේ සපුගස්කන්ද ප්‍රදේශයේ පදිංචි 72 හැවිරිදි අයකුටයි.

චූදිතගේ වයස හා පෙර වැරදි නොමැති බවට වූ වාර්තා සලකා බලමින් විනිසුරුවරයා මෙලෙස දඬුවම් දඩුවම් නියම කළා.

මෙම සිද්ධිය සම්බන්ධයෙන් 2018 වසරේදී සපුගස්කන්ද පොලිසිය විසින් මූලික විමර්ශන සිදුකිරීමෙන් අනතුරුව නීතිපතිවරයා විචින් චූදිතට එරෙහිව අධිචෝදනා ගොනුකොට තිබිණා.

රජයේ නීතිඥ සචින්තනී ප්‍රනාන්දු නීතිපතිවරයා වෙනුවෙන් අධිකරණය හමුවේ පෙනී සිටියා.

සපුගස්කන්ධ පොලිසියේ කොස්තාපල් (98628) සඳරුවන් පැමිණිල්ල වෙනුවෙන් පෙනී සිටියා.