අමෙරිකාවේ දිගු දුර මිසයිල අවසන්?

අමෙරිකා එක්සත් ජනපදය සහ ඉරානය අතර මැදපෙරදිග කලාපයේ පවතින යුද ගැටුම හරහා අමෙරිකා එක්සත් ජනපදය සතු අවිආයුධ සංචිතය ක්ෂය වෙමින් පවතින බවට තොරතුරු වාර්තාවෙමින් පවතිනවා.

ඒ අනුව එක්සත් ජනපදය සතු ඉතා නිවැරදි ප්‍රහාර එල්ල කළ හැකි දිගු දුර මිසයිල තොගයෙන් වැඩි ප්‍රමාණයක් භාවිතා කර අවසන් කර ඇති බවත් මේ හේතුවෙන් අනාගත යුද ගැටුම් සඳහා මුහුණදීමේදී අමෙරිකාවේ යුද ශක්තිය සම්බන්ධයෙන් ප්‍රශ්නාර්ථයක්ද මතුව තිබෙනවා.

එක්සත් ජනපද මූලාශ්‍ර උපුටා දක්වමින් විදෙස් මාධ්‍ය වාර්තාකරන්නේ එක්සත් ජනපදය මෙම අවි ප්‍රමාණයෙන් බොහෝ ප්‍රමාණයක් භාවිතකර ඇති බවයි.

අමෙරිකානු ඩොලර් මිලියනයකට වඩා වැඩි මුදලක් වැය වන මෙවැනි අවි අනාගතයේදී චීනය සමඟ ඇති විය හැකි ඕනෑම ගැටුමකදී ද වැදගත් වනු ඇතැයි විශ්ලේෂකයින් අනාවරණය කරනු ලබනවා.

කෙසේවෙතත් එක්සත් ජනපදය සතුව ඉතිරිව ඇති එක් එක් යුධෝපකරණ ප්‍රමාණය කොපමණදැයි අනාවරණය වී නැහැ.

මේ අතර ඉරාන යුද ගැටුම ආරම්භ වීමට පෙර එක්සත් ජනපද මධ්‍යම විධානය විසින් භූමියේ තිබූ මිසයිල ප්‍රමාණයන් භාවිතා කර අවසන් කර ඇතත්, ලොව  අනෙකුත් ප්‍රදේශවල ඇති අමෙරිකානු හමුදා සැපයුම්වලින් එම සංචිත නැවත පුරවා ගැනීමට හැකි වී ඇති බවයි වාර්තාවන්නේ.

එමෙන්ම පෙබරවාරි සහ ජූලි අතර කාලය තුළ ප්‍රේට්‍රියට් (Patriot) මිසයිල ආරක්ෂණ පද්ධති සතු මිසයිල තොග සංචිතයෙන් ආසන්න වශයෙන් 65% ක් පමණ භාවිත කර ඇති බවටත්, එක්සත් ජනපද අවි ගබඩාවේ THAAD (තාඩ්) බැලැස්ටික් මිසයිල නාශක සංඛ්‍යාව යුද්ධය ආරම්භයට වඩා අවම වශයෙන් 38% කින් පහත වැටී ඇති බවද සඳහන්.

එමෙන්ම යුද්ධය ආරම්භයේ සිට නැව්වලින් දියත් කරන ලද, ගෝලීය ටොමහෝක් (Tomahawk) කෲස් මිසයිල සැපයුමෙන් අඩකට ආසන්න ප්‍රමාණයක් ද අමෙරිකාව භාවිතා කර ඇති බවයි විදෙස් මාධ්‍ය වර්තාකරන්නේ.

මෙවන් පසුබිමක අමෙරිකාව සහ ඉරානය අතර පැවැත්වෙන නව වටයේ සාකච්ඡා සම්බන්ධයෙන් අදහස් දක්වමින් ජනපති ට්‍රම්ප් පවසන්නේ ඉරානය පිළිගැනීමට අකමැතිවුවද දෙපාර්ශ්වය අතර නව වටයේ සාකච්ඡා ඉතා හොඳ මට්ටමෙන් සිදුකරගෙන යන බවයි.