ශ්‍රී ලංකාව සුළුකොට තකන්න එපා - ඉන්දීය ක්‍රිකට් ක්‍රීඩකයින්ට ගවස්කාර්ගෙන් අවවාද

ශ්‍රී ලංකාව සමඟ ආරම්භ වීමට නියමිත ටෙස්ට් තරගාවලියට පෙර, ශ්‍රී ලංකා කණ්ඩායම සුළුකොට නොතකන ලෙස හිටපු ඉන්දීය ක්‍රිකට් නායකයෙකු වන සුනිල් ගාවස්කාර් ඉන්දීය කණ්ඩායමට අවවාද කර තිබෙනවා.

ක්‍රීඩා සඟරාවක් වෙත අදහස් දක්වමින් ඔහු කියා සිටියේ, ශ්‍රී ලංකා කණ්ඩායම සිය මව්බිමේදී ඉතා ප්‍රබල ප්‍රතිවාදියෙකු විය හැකි බැවින් මෙම තරගාවලිය පහසු නොවනු ඇති බවයි.

අනිද්දා ආරම්භ වන මෙම තරගාවලිය සඳහා එක්වන ඉන්දීය ටෙස්ට් ක්‍රිකට් කණ්ඩායම මේ වනවිටත් දිවයිනට පැමිණ සිටිනවා.

ඕනෑම ක්‍රීඩකයෙකු කෙතරම් විශිෂ්ටයෙකු වුවද, පුද්ගලික අවශ්‍යතාවලට වඩා ඇතැම්විට ක්‍රිකට් ක්‍රීඩාවට මුල්තැන දිය යුතු බව ද ගාවස්කාර් අවධාරණය කළා.

ශුබ්මන් ගිල්ගේ නායකත්වයෙන් යුත් ඉන්දීය කණ්ඩායම මේ වන විට ලෝක ටෙස්ට් ශූරතා ප්‍රසාද ලකුණු සටහනේ 5 වැනි ස්ථානයේ පසුවන අතර, ශ්‍රී ලංකා කණ්ඩායම පසුවන්නේ 6 වැනි ස්ථානයේයි.