சவூதி அரேபியாவை 4-0 என வீழ்த்தி ஸ்பெயின் அபார வெற்றி

கால்பந்து கிண்ணத் தொடரின் 'H' பிரிவு லீக் ஆட்டத்தில் ஸ்பெயின் மற்றும் சவூதி அரேபிய அணிகள் மோதின.

அட்லாண்டா மைதானத்தில் 68,239 ரசிகர்கள் முன்னிலையில் நடைபெற்ற இந்த போட்டியில், ஸ்பெயின் அணி 4-0 என்ற கோல் கணக்கில் சவூதி அரேபியாவை வீழ்த்தி அபார வெற்றி பெற்றது.

ஆட்டம் தொடங்கிய முதலே ஸ்பெயின் அணி அதிரடி ஆட்டத்தை வெளிப்படுத்தியது. போட்டியின் 10ஆவது நிமிடத்தில், மைக்கல் ஓயர்சபால் (Mikel Oyarzabal) உதவியுடன் லாமினி யமால் (Lamine Yamal) ஸ்பெயின் அணிக்கான முதல் கோலை அடித்தார்.

அதனைத் தொடர்ந்து, 21ஆவது நிமிடத்தில் அய்மெரிக் லபோர்ட்டின் (Aymeric Laporte) உதவியோடும், 24ஆவது நிமிடத்தில் டானி ஓல்மோவின் (Dani Olmo) உதவியோடும் மைக்கல் ஓயர்சபால் அடுத்தடுத்து இரண்டு கோல்களை அடித்து அசத்தினார்.

இதன் மூலம் ஆட்டத்தின் முதல் பாதியிலேயே ஸ்பெயின் அணி 3-0 என வலுவான முன்னிலையைப் பெற்றது.

ஆட்டத்தின் இரண்டாவது பாதியில், 49ஆவது நிமிடத்தில் சவூதி அரேபிய அணியின் ஹசன் அல் தம்பக்தி (Hassan Al Tambakti) துரதிர்ஷ்டவசமாக ஒரு 'ஒவ்ன் கோல்' (Own Goal) அடித்தார். இதனால் ஸ்பெயின் அணியின் கோல் எண்ணிக்கை 4 ஆக உயர்ந்தது.

ஆட்ட நேர முடிவில் சவூதி அரேபிய அணியால் கோல் எதுவும் அடிக்க முடியவில்லை.