යුද්ධය අවසන් කිරීම සඳහා "තිරසාර" යෝජනාවලට සවන් දීමට ටෙහෙරානය කැමැත්තෙන් සිටිනවා: ඉරාන ආරංචිමාර්ග

අමෙරිකා එක්සත් ජනපදය සහ ටෙහෙරානය අතර "සම්බන්ධීකරණයක්" සිදුව ඇති බවත්, යුද්ධය අවසන් කිරීම සඳහා වන "තිරසාර" යෝජනාවලට සවන් දීමට ඉරානය සූදානම් බවත්, ඉරාන මූලාශ්‍රය උපුටා දක්වමින් CNN පුවත් සේවය වාර්තා කරනවා.

"පසුගිය දිනවල වොෂින්ටනයේ මූලිකත්වයෙන් අමෙරිකා එක්සත් ජනපදය සහ ඉරානය අතර සබඳතා ගොඩනැගී ඇති නමුත්, එය තවමත් පූර්ණ සාකච්ඡා මට්ටමකට පැමිණ නැහැ," යැයි එම මූලාශ්‍රය සඳහන් කර තිබෙනවා.

යුද්ධය අවසන් කිරීම සඳහා එකඟතාවයකට පැමිණිය හැකිද යන්න සොයා බැලීමට විවිධ මැදිහත්කරුවන් හරහා පණිවිඩ ලැබී ඇති බවද එහි සඳහන්.

"දැනට සලකා බලමින් පවතින යෝජනා හුදෙක් සටන් විරාමයක් ලබා ගැනීම සඳහා පමණක් නොව, අමෙරිකාව සහ ඉරානය අතර පවතින ගැටුම අවසන් කිරීම සඳහා වන ස්ථිර එකඟතාවයක් ඉලක්ක කරගත් ඒවා වේ," යැයි එම පුවත් සේවය සඳහන් කරනවා.

සාකච්ඡා සම්බන්ධයෙන් අමෙරිකානු ජනාධිපති ඩොනල්ඩ් ට්‍රම්ප් සිදුකරන ප්‍රසිද්ධ ප්‍රකාශ පිළිබඳව අදහස් දැක්වීම එම මූලාශ්‍රය ප්‍රතික්ෂේප කර ඇති අතර, ඕනෑම ප්‍රායෝගික යෝජනාවක් සලකා බැලීමට ටෙහෙරානය සූදානම් බව ඉරානයේ ස්ථාවරය සැමවිටම පැහැදිලි බව අවධාරණය කර ඇති බව සඳහන්.

"ඉරානය අමෙරිකාව සමග සෘජු සාකච්ඡා හෝ හමුවීම් ඉල්ලා සිටින්නේ නැහැ. නමුත් ඉරාන ඉස්ලාමීය ජනරජයේ ජාතික අවශ්‍යතා ආරක්ෂා වන පරිදි තිරසාර ගනුදෙනුවක් සඳහා සැලසුමක් ඉදිරිපත් වන්නේ නම් ඒ පිළිබඳව සවන් දීමට සූදානම්," යැයි එම මූලාශ්‍රය වැඩිදුරටත් පවසා තිබෙනවා.

"ඉරානය කිසිවිටෙකත් න්‍යෂ්ටික අවි නිපදවන්නේ නැති බවට අවශ්‍ය සියලු සහතික ලබා දීමට සූදානම්, නමුත් සාමකාමී අරමුණු සඳහා න්‍යෂ්ටික තාක්ෂණය භාවිතා කිරීමට අපට අයිතියක් තිබෙනවා." ඕනෑම යෝජනාවකට ඉරානයට පනවා ඇති සියලුම සම්බාධක ඉවත් කිරීම ද ඇතුළත් විය යුතු බව එම මූලාශ්‍රය වැඩිදුරටත් අවධාරණය කර ඇති බවයි CNN පුවත් සේවය වාර්තා කරන්නේ.