ඉන්දු - ජපාන 8 වැනි ආරක්ෂක ප්‍රතිපත්ති සංවාදය සාර්ථකව නිමාවට පත්වෙයි

ඉන්දියාව සහ ජපානය අතර 8 වැනි ආරක්ෂක ප්‍රතිපත්ති සංවාදය පසුගිය ජපානයේ ටෝකියෝ නුවරදී සාර්ථකව නිමාවට පත්වුණා.

මෙහිදී දෙරට අතර පවතින ද්විපාර්ශ්වික ආරක්ෂක සහයෝගීතාවයේ කැපී පෙනෙන ප්‍රගතිය සමාලෝචනය කළ දෙපාර්ශ්වයම, ඉන්දු-ජපාන විශේෂ උපායමාර්ගික සහ ගෝලීය හවුල්කාරිත්වය තවදුරටත් ශක්තිමත් කිරීමට ඇති කැපවීම යළිත් සහතික කළා.

මෙම සාකච්ඡා වටය සඳහා සහභාගී වූ ඉන්දීය දූත පිරිසට ආරක්ෂක ලේකම් රාජේෂ් කුමාර් සිං නායකත්වය දුන් අතර, ජපන් පාර්ශවය මෙහෙයවනු ලැබුවේ ජාත්‍යන්තර කටයුතු පිළිබඳ ආරක්ෂක උප ඇමැති කනෝ කෝජි විසින්.

"මෙම සංවාදයේදී දෙරටේ හමුදාමය හුවමාරු, ඒකාබද්ධ මූලස්ථාන අතර සහයෝගීතාව, සමුද්‍රීය සහයෝගීතාව, ඒකාබද්ධ ආරක්ෂක අභ්‍යාස, ධාරිතා සංවර්ධනය මෙන්ම සමුද්‍රීය තාක්ෂණය ඇතුළු ආරක්ෂක උපකරණ සහ තාක්ෂණික සහයෝගීතාව වැනි ද්විපාර්ශ්වික ආරක්ෂක සබඳතාවල සමස්ත පරාසයම දීර්ඝ ලෙස සමාලෝචනයට ලක් කෙරුණා," යනුවෙන් ඉන්දීය රජයේ නිල නිවේදනයක සඳහන්.

ආරක්ෂක සහයෝගීතාව අඛණ්ඩව වර්ධනය වීම පිළිබඳව දෙපාර්ශවයේම ප්‍රසාදය පළ වූ අතර, ඉහළ මට්ටමේ රාජ්‍ය තාන්ත්‍රික හුවමාරු සහ සාකච්ඡා මාධ්‍යයන් අඛණ්ඩව පවත්වාගෙන යාමේ වැදගත්කම ඔවුහු අවධාරණය කළේ.

මීට අමතරව, මේ වසර අගභාගයේදී පැවැත්වීමට නියමිත '2+2' අමාත්‍ය මට්ටමේ සාකච්ඡා ඇතුළු ඉදිරි නිල අමාත්‍ය සංචාරවලින් අපේක්ෂිත ප්‍රතිඵල පිළිබඳවද මෙහිදී සාකච්ඡා කර තිබෙනවා.

කලාපීය සහ ගෝලීය ආරක්ෂක ගැටලුවලදී ඉන්දියාව සහ ජපානය අතර පවතින අන්‍යෝන්‍ය එකඟතාවය පිළිබඳව සතුට පළ කළ දෙපාර්ශවයම, ඉන්දු-පැසිෆික් කලාපයේ ස්ථාවරත්වය වෙනුවෙන් වඩාත් සමීපව කටයුතු කිරීමට එකඟ වී ඇති බවයි වාර්තා වෙන්නේ.

ජාත්‍යන්තර නීතියට ගරු කරමින් නිදහස්, විවෘත සහ නීතිගරුක ඉන්දු-පැසිෆික් කලාපයක් ප්‍රවර්ධනය කිරීම සඳහා වන තම කැපවීම ඔවුහු යළිදු අවධාරණය කර තිබෙනවා.

එහිදී කනෝ කෝජි සඳහන් කළේ ඉන්දියාව සමඟ පවතින ආරක්ෂක සබඳතා ප්‍රමුඛතා ක්ෂේත්‍ර ඔස්සේ තවදුරටත් පුළුල් කිරීමට ජපානය සූදානම් බවයි.

මෙම සංවාදයට පෙර, ඉන්දීය ආරක්ෂක ලේකම්වරයා ජපන් ආරක්ෂක ඇමැති ෂින්ජිරෝ කොයිසුමි හමුවූ අතර, එහිදී ඉන්දීය ආරක්ෂක ඇමැති රාජ්නාත් සිංගේ සුභපැතුම් ඔහු වෙත පිරිනමා තිබෙනවා.

එහිදීද දෙරට අතර පවතින විශේෂ උපායමාර්ගික සබඳතාවල වර්ධනය දෙපාර්ශවයම අගය කරනු ලැබුවා.

එමෙන්ම, හැකි ඉක්මනින් ඉන්දියාවේ නිල සංචාරයක නිරත වන ලෙස රාජ්නාත් සිං කළ ආරාධනයද ආරක්ෂක ලේකම්වරයා විසින් ජපන් ආරක්ෂක ඇමැතිවරයා වෙත නිල වශයෙන් භාර දෙනු ලැබූ බවයි වාර්තා වෙන්නේ.