வெயிலுக்கு விடை கொடுக்கும் ‘தாமரை இலை’ - சீனாவில் வைரலாகும் விசித்திரமான முறை

சீனாவின் சிச்சுவான் மற்றும் அதனைச் சுற்றியுள்ள பகுதிகளில் கடும் வெயிலிலிருந்து தப்பிக்க மக்கள் பெரிய தாமரை இலைகளை முகமூடியாகப் பயன்படுத்தும் புதிய முறை சமூக வலைதளங்களில் வைரலாகி வருகிறது.

விலை உயர்ந்த இரசாயன சன்ஸ்கிரீன் (Sunscreen) கிறீம்களுக்குப் பதிலாக, இயற்கையான முறையைக் கையாளும் இந்த விசித்திரமான போக்கு இணையத்தில் பலரையும் கவர்ந்துள்ளது.

பெரிய தாமரை இலைகளைப் பறித்து, கண்களுக்கும் மூக்கிற்கும் ஏற்ப சிறிய துளைகளைச் செய்து கொள்கின்றனர். பின்னர், அதனைத் தலைக்கவசம் (helmet) அல்லது தொப்பியின் மூலம் முகத்தில் கழன்றுவிடாமல் இறுக்கமாகக் கட்டிக் கொள்கின்றனர்.

கோடைக்காலத்தின் தீவிர வெப்பத்தில் இருந்து முகத்தைக் காப்பாற்றவும், வெயிலால் முகம் கருப்பாவதைத் தடுக்கவும் இந்த எளிய வழியைப் பயன்படுத்துகின்றனர்.

விலை உயர்ந்த அழகுசாதனப் பொருட்கள் எதுவும் இன்றி, முற்றிலும் இலவசமாகவும் இயற்கையாகவும் கிடைப்பதால் இந்த முறை பல இளைஞர்கள் மற்றும் பெண்களிடையே பிரபலமாகியுள்ளது.

இந்த முறை இயற்கையான குளிர்ச்சியைத் தந்தாலும், வாகனம் ஓட்டும்போது முகத்தில் கட்டியிருக்கும் பெரிய தாமரை இலைகள் மற்றும் நீண்ட தண்டுகள் பார்வையை மறைக்கலாம் அல்லது விபத்துகளை ஏற்படுத்தலாம் என நிபுணர்களும் சமூக வலைதள பயனர்களும் எச்சரித்துள்ளனர்.

இருப்பினும், இந்தச் சூழல் பாதுகாப்பு மற்றும் புதுமையான முறை உலகம் முழுவதும் உள்ள மக்களிடையே பெரும் கவனத்தைப் பெற்றுள்ளது.